5/4/20 雨
馬辣台式鴛鴦火鍋,聽聞香港果間並非台灣果間.但既然台灣果間未有機會試,就食下香港呢間先.
價錢就好平架喇,假日168蚊加一,所以幾乎無乜期望咁食,純粹為左過下口癮.
疫情底下,餐廳有相應座位分隔安排,座位分得好疏落,亦以兩人座位為主,結果到七點半八點都坐滿了.
呢度任飲任食火鍋既玩法係,肉類及海鮮用紙筆落單,其餘多款火鍋配料及蔬菜等就自己走去餐廳中央既貨架,任君選取.
一人一個白色膠兜,隨自己食量及喜好去夾取想食既野,咁樣可盡量唔造成浪費,亦可以試更多不同種類既食物,岩晒啲咩都想試少少既貪心鬼.
另外,醬油配料都好多,今次我就試撈沙茶醬,幾香口不過有少少搶味.
飲品方面,都係例牌一罐罐既飲品,呢度有咖啡機,啤酒任飲,又有幾款特色飲品自己斟.
甜品方面,有迷你cake或布甸,雪糕雪條之類啲例牌野,都係同一般放題差唔多.
呢間野用馬辣黎響朵,相信大家或者都睇過呢間野既介紹,所以今次我無特別周圍影相,主要都集中於食.
肉類品質黎講,咁既價位都唔預食到啲咩靚牛,佢有成六款咁多,其實turn out都分唔清邊款打邊款.
唯獨是有一款想講幾有牛味,半肉半筋,咬落幾好有驚喜,不過再嘗試叫番都遇唔岩.
蜆類比預期新鮮,配埋胡椒豬肚湯底幾鮮甜,所以追加多碟,唔錯唔錯.
至於麻辣湯底有啲過鹹,所以食食下都無繼續淥野食.
甜品呢度竟然有榴槤布甸及榴槤雪條,搞到我連啪兩支,布甸質素亦都唔差.
服務方面,雖然呢度落單上菜速度唔慢,但覺得呢度有少少拖住啲野食refill,魷魚被人拎晒之後,行左兩三轉先見到refill,果下已經接近飽晒都唔想再拎.
另外,呢度既牛肉叫一份只有四片薄片,切得超級薄,.叫左碟鯇魚腩,又係細件到無輪,滾完個湯之後縮水縮到啲魚骨凸晒出黎,幾乎食唔到肉,我係咁耳啃兩下就放番低,無再叫過.
如果想打下邊爐過下口癮,呢間馬辣都還可以既.食材款式雖然多仲任揀,但實際揀得落手會想食既都唔算好多,反而出面一般火鍋放題既配料仲吸引,大概就係咁.
