《那夜凌晨，我坐上了旺角開往大埔的紅VAN》影評(PART TWO 劇透慎入)

8/3/14 陰

第三十八屆香港國際電影節
《那夜凌晨，我坐上了旺角開往大埔的紅VAN》影評(PART TWO 劇透慎入)
以下影評將會劇透,含有電影內容,或會影響入場觀看情緒,敬請留意!

重溫PART ONE 不含劇透: (PART ONE與PART TWO影評內容互不重複)
http://raymondsoso.blogspot.com/2014/03/vanpart-one.html

好野,今次可以好爽地暢談電影版紅VAN,呢部分主要係講番電影與文本的分別,其餘感受多數已經響上一部分提及.
我當然唔會要求電影拍到同原著一模一樣,現實有限制,我都理解,但我都希望盡可能貼及原著般寫實.
所以劇情編排上,我覺得可以交代多啲游梓池,例如佢踏單車出九龍,一出獅子山隧道,鏡頭唔夠五秒,轉眼就到美孚,其實都幾唔合理.
反而好多交代人物背景,我覺得太過多太過長,無必要咁做.
另外,正如上一部分所講,我見唔到大埔中心八號花園真係好失望,就連關鍵地點,大埔舊墟公園,都無收錄於電影之內.
舊墟公園夜晚係可以拍得好恐怖,我唔明點解唔取景,係咪康文署唔批准,定係空間太細唔夠位置拍攝.
響天后古廟前姦屍,真係大吉利是,仲要個港女易容易得咁樣衰,點解兩個MK潮童會想姦屍,sosad.
同埋無諗到製作單位放棄華立茶餐廳,因為原著故事,班友會轉移陣地,但電影就無呢一個幕.
主要因為油頭毒撚唔再係死於廚房爐灶,而係被燒成火人,直奔出餐廳外燒死.
另外,跑寶鄉橋等等,都無再出現,反而大埔墟取景就多左.

故事刪剪方面,都刪了不少,沒有廣福邨部分,亦沒有中年男人日本仔上身的驚嚇情節,另外只得其中一個潮童姦屍.
另外,最大轉變是故事角色死亡的次序.
在中大下車的四子(原著有女生),先有一個病發化成灰,之後三人跑落吐露港求救,相繼病發.原著係佢地並無死,而其中一個中大生仲好幫得手先啱.
另外一個重點在於如果死去,原著係有規律,逐個按時自然病發死亡.
但今次電影又唔似咁樣表達,好似係成班人聯手殺死姦屍的MK潮童,而最尾阿信送佢一程.我都唔太肯定.

其他改動方面,今次無提及街燈上的tin can,唔知下次會否提及.
另外,我最不滿係整個故事太短,竟然以佢地出發去大帽山收結,有無搞錯?!呢度只係文本唔夠一半的部分,咁幾時先到結局呀大佬.
佢仲要唔行林錦公路,改行九龍,即係有排都未到真相.
同埋個結局又係無聊,兩架面具人駕駛的衝鋒車,在工業邨夾擊紅VAN,唔知想殺死佢地定係點.(原著班人邊有咁快見到面具人丫)
雖然咁樣表現出紅VAN的堅固,但如果咁樣草草收結,我對個故事就真係失望.
至於搞笑部分,印象深刻有串特首,串無得普選,仲有嘲諷Google語音翻譯,同埋無端端走個北韓人出黎,痴筋,笑死我.
至於林雪同李燦森又係屈機既,啲表現和動靜好鬼好笑.

不過戲裡有一幕加插的,一定要講,就係眾人公審姦屍的潮童.
原著好似係話成班人攞凳去狂打條友,但電影係好恐怖好核突,係逐個人在潮童身上插一刀,嘩!好變態呀~
呢一部分都拖得幾長,似乎想講社會的公義法紀問題,到底一個只有十七人的世界,仲需唔需要法律和公平公正的審判呢?
仲有唔少人話好期待入場睇條友點樣姦屍喎,呢層我就唔講嘞,其實無咩特別,你自己入場睇啦,laugh out loud.

仲有其他或大或小的改動,我就唔詳談了,已經劇透得太多,哈哈.
好期待下集,好想知架小巴被撞至變形,可以點樣捱落去呢?...

重溫PART ONE 不含劇透: (PART ONE與PART TWO影評內容互不重複)
http://raymondsoso.blogspot.com/2014/03/vanpart-one.html