無盡旅途 Endless Journey

14/7/15 晴

加洲之旅 2014 夏 Ep.8 優勝美地國家公園

如果話我人生第一次旅行係美國洛杉磯,果次應該算係自遊行.
咁我人生第一次參加旅行團,應該就係今次.
大朝早由Oakland唐人街坐旅遊巴出發.
呢個旅行團重點當然係著名既優勝美地國家公園 Yosemite National Park.
而兩日一夜既行程下,第二日會搭單參觀埋完全零認知既赫斯古堡 Hearst Castle.
其實睇番地圖,赫斯古堡個位置就響正三藩市及洛杉磯之間既中心點.
即係話我地會行左去洛杉磯既一半路,其實去左好遠,lol.
響美國,真係唔好睇少汽車既威力,佢可以帶你穿洲過省,甚至踩到離國墨西哥都得!
所以,做司機真係辛苦,閒閒地揸幾個鐘頭車無得抖,令人敬佩.

離開高速公路,走入通往優勝美地山脈的山路,兩旁都係黃泥石地.
再向上走,開始feel到海拔既氣壓,要吞口水,難怪導遊提醒可能會有輕微高山症.
幾個鐘頭車程入去,睇既就只有山,樹,石,部分湖水,完.好聽啲,就花崗岩懸崖,瀑布,溪流,巨杉,等等.
你話值唔值呢?就見仁見智.但我都覺得OK既,因為本身出發去美國之前都想黎.
既然黎到美國,就算去唔到黃石公園,都應該踏足下美國政府保存得好好既大自然,觀賞下Yosemite既壯麗景色.
不過如果中意睇海既人,黎到呢度就應該覺得好悶.

我地唔係花得太多時間響園內景點停留,影多張相都無時間,就要急急腳上車,好趕,真係好鴨仔團feel.
不過無辦法啦,Yosemite實在太大,莫講話大半日時間只能遊覽公園一小部分,根本上離開公園都好花時間,要好早就走.
所以,落車步行時間不多,大部分時間都係響車上.
我都唔係好認得駐足過既景點叫咩名,總之就係山啦,或者花崗岩,lol.
但印象中佢地個名如下:
El Capitan,新娘面紗瀑布（Bridalveil Fall）,半月丘,Tunnel View.有興趣的話可以google下,就係以下相片之處.
個體驗都幾難忘,因為置身其中,會覺得好舒服好寧靜好清幽.
如果唔係夏天咁乾燥,應該會有瀑布睇,但果日去就無水流,淨係得座山,要從外型推斷瀑布的位置.

睇完Yosemite,去左一間餐館,食自助晚餐.
雖然要自費十幾蚊美金,但野食款式都算多,質素OK,只不過又係果句:唔夠時間,好趕.
夜晚就響西岸中部城市Fresno,住一晚酒店.我地好彩,入住到假日酒店 Holiday Inn,環境唔錯.

待續