無盡旅途 Endless Journey

3/12/17 晴

桂林深圳之旅 2017 Sue & Raymond 9 - 14 Nov 2017
#thesweetestcoupleinguilin #thesweetestcoupleinshenzhen

Episode 11
Day 4 - 南溪山/靖江王府/桂林米粉宴/靖江王陵博物館/高鐵回程

 

桂林旅行團最後一日,話說有人好眼訓唔想起身,結果得我一個好毒J地落去酒樓食自助餐,順便拎啲野食俾佢食.
我發覺呢間新西街國際大酒店真係日頭都黑媽媽的,係靠中庭天井的自然光,先勉強睇到周圍環境.
桂林一帶酒店,自助早餐多數都有廚師即煮桂林米粉,然後自己DIY加料,幾好玩幾freestyle.我就中意朝早食得濕啲飲多啲湯.

拎埋行李離開酒店,由陽朔返回桂林.今日係relax day,行程相對簡單及容易.首先去市內的居民公園,南溪山公園.
顧名思義,呢個公園係觀賞南溪山呢座山的,桂林真係好多座山,haha.
搵岩位置同角度,其實呢座山又真係幾靚幾宏偉既,因為佢表面啲紋路顯得佢幾有氣派.
沿小道向裡頭行,會去到一個好空曠的草地,有啲似日本東京的新宿御苑,亦似香港的佐敦谷公園(但大好多).

 

接住係另一個自費項目,靖江王府.因為係導遊為我地加插的行程,所以我地本身對呢度都一無所知,總之大隊去就跟埋去啦,haha.
靖江王府係明朝藩王靖江王朱守謙的藩王府,呢度展出了唔同王爺年代的歷史,不過我就興趣不大,都係專注睇風景.
裡頭有一間房間,俾大家玩下拓印,自己揼下揼下,整張福字,不過拎走係要俾錢既,所以偷偷影相算.
靖江王府另一重點係庭園中間的獨秀峰,又係另一座山,但載著截然不同的歷史.
表面見到好多刻上的字句,其中經典的「桂林山水甲天下」就係出自呢度.
再向前行就係一個貢院,即係讀書考試的地方.可以走入去一格格的考試室,扮答試卷,然後有一位參加者就會被揀選為狀元.幾有趣.

 

最後一餐團餐,係桂林米粉宴,有濕有乾,味道都可以既,不過份量可以再多啲,覺得大家係就住食.
大家順便響隔離手信店掃貨,一包二包,拎埋上車帶番香港.
桂林團最後一站,係靖江王陵博物館,唔好將佢同今朝既靖江王府溝亂,因為係兩個唔同地方黎.
靖江王陵博物館的確藏有不同王爺的陵墓,但原來唔會入去睇,只會響外面最表皮的地方逗留,主要聽導賞員講解.
所以其實就無咩野睇,只係聽導賞員用風水學解釋靖江王陵的獨特結構及建築原意,雖則佢講風水講命理都講得幾好聽.

參觀完博物館其實只係兩點鐘,但聽講我地班高鐵要成六點鐘,FF呢段時間可唔可以響桂林附近再行下,逛埋我地未睇晒既正陽步行街呢,haha.
終於要啟程回家了,同導遊小陽響桂林北站道別後,就響站內等候區慢慢坐住等,夠鐘再上車.
今次坐番二等座,同領隊一齊坐,一程過,直接返到深圳.三小時車程,最後我都訓到大半個鐘至一個鐘,都算係咁.

不過唔好以為我地今次旅行就咁完結呀,因為依家先係我地深圳之旅的開始,繼續留意下一集啦~