12/11/18 陰
台北之旅 2018 Sue & Raymond 16 - 21 October 2018
#thesweetestcoupleintaipei
#4 萬國酸菜麵/茗時序茶飲/永康牛肉麵/信義區
Day3 - 18 Oct (Thu)
西門町比較local地道的平民早餐店,要轉入後巷先搵到既萬國酸菜麵,如果唔係睇到網上食評,就咁響街上見到殘舊的招牌,都未必夠膽入去食.
台灣既麵食好興分湯麵同乾麵兩類,我自己就中意湯麵,Sue就想試下乾麵.
一個酸菜蛋餛飩湯麵,一個酸菜乾麵另加蛋.本身落單要中size,但感覺阿姐好似整左大碗俾我,因為真係大碗到食唔晒.
酸菜麵,感覺有啲似平時食既雪菜肉絲麵,不過雪菜係一粒粒好細粒,酸菜就比較大塊少少.
唔好期望特別好食,但勝在夠平,夠地道,似做街坊生意,食到與別不同的風味.
乾麵有少少豬油去拌,味道有少少驚喜,唔怕無湯的話可以一試.
食完早餐,行番落南面,茗時序茶飲剛好開門,就叫杯鮮奶公芋,有超細粒芋圓,芋頭粒,飲落幾Q彈幾過癮.
一路飲,一路行西門町步行街,今朝係Sue行藥妝店血拼既時間,康是美,屈臣氏,行完一間又一間,格價之餘又要搵貨品,搞左一輪先買晒想買既野返Airbnb.
出番黎已經午飯時間,就搭捷運到東門站,去食鼎鼎大名的永康牛肉麵.
永康牛肉麵亦係遊客熱點,但原來本地人都ok,不過以台灣物價黎講都算貴,所以我地係係當試一次.
半筋半肉麵,我覺得質素係高既,牛肉夠軟腍而唔痴牙,係部位揀選得好,牛筋亦都無問題,湯底有丁點辣,整體夠香濃,所以的確好食.
我發現台灣啲人食麵既份量都幾多,我就咁叫個細碗,已經覺得份量好足夠,如果大碗真係食唔晒.
成個台北之旅就係食食食,食完牛肉麵,行去永康街,一路飲住杯50嵐珍珠奶綠,一路行呢頭既店鋪,亦響一間叫「來好」既鋪頭買左啲精品,都幾有趣.
行完永康街,跟住就坐捷運去下一個checkpoint,信義區.
信義區其實唯一重點,就係俾Sue行新光三越周年慶!
不過,由台北101/世貿站出到黎,首先係同番台北101大樓影相,因為前一晚夜晚無影相,日間補影番.
我地發現原來響台北市政府大門口出面影101係最靚既,夠空曠,影得晒成個景.
