無盡旅途 Endless Journey

7/10/20 涼

歲月不饒人,我地大家都大個,我地昔日追隨既補習老師都老了.
但Wilson Liu其實仲好後生,先得果四十幾歲,諗住佢會一路繼續教,近月聽到佢退出補習界,都有啲出乎意料.
不過又無計既,出生率一年比一年低,大學入U率又一年比一年高,基本上係人都考得入大學,仲邊駛補習.
而今年疫情重創補習行業,大型補習社如現代教育都執剩一間分校,真係悲哀.
加上近年興起網上Online補習教學,再唔需要撲去補習社報名,以追星既心態去上補習名師既課程.
相信今年如果Wilson Liu同英皇教育續約,可能都無乜肉食,不如趁機會休息一下好過.
早排仲有老蕭蕭源被判監既新聞,都係令人唔開心既消息,昔日英皇補習巨頭既年代,終需完結.

響連登掃啲人對Wilson Liu既comments,不乏重溫當年上佢堂既精彩片段.
Wilson Liu最著名既係佢既跳跳虎定理,小明定理,same尖Theorem...不過唔好問我係乜,我咩都唔記得晒了,haha.
我對佢既第一印象,一定係佢果句金句: "係咪呀hmmmm??" ("係咪呀嗯?")
果個"嗯"字係精髓,因為係要轉音由低至高,其實唔知佢講黎做乜9,但呢句被佢濫用到好搞笑,lol.
當時英皇幾個龍頭,蕭源,Derek Liu,Wilson Liu,Alan Cheng,佢地會互笑對方,記得蕭源曾經爆過Wilson Liu真名係廖仲乾,係乾隆個乾,唔係乾濕個乾,仲話佢以前英文名係Bill, Bill Liu,笑死,是真是假就唔知了.

我對Wilson Liu既回憶,除左佢既金句,佢部分教授既skills同techniques都受用一生.
佢教MC卷其實幾屈機的,基本上可以幫助你全取滿分.
Long questions方面,可能就無其他補習老師教得咁優秀,但對補底既學生黎講都好有幫助.
當時佢同蕭源間唔中派熒光筆俾學生,一條題目,佢可以用上四五支顏色筆去做,幫助理解題目,結果搞到我去考DSE,檯頭都鋪滿顏色筆,haha.
佢亦試過講到好激動,好痴線咁用熒光筆畫計數機個熒幕,真係睇到眼都凸.
講起計數機,Wilson Liu用計數機又係屈機既,佢推介過programme幫助人答MC卷,又教大家sub數大法,最癲係試過叫人用計數機當係塊鏡作反射去答試題.
不過,Wilson Liu亦試過唔識用計數機,計黎計去都計唔到想要既答案,蝦轆畫面笑死全場.

我響九龍灣總校上video班期間都見過Wilson Liu真人,無諗到佢會突然出現,仲視察學生情況.
鏡頭上既Wilson Liu係一個活潑好多野講既肥仔,語氣串串貢,間唔中搞下gag,講書又會好激動既補習阿sir.
鏡頭下既Wilson Liu反而係唔多野講,少少cool,有少少威嚴而且幾型幾有霸氣.

連登不少人提及Wilson Liu另一嗜好,就係講鹹gag.
其中一個例子係專登響條幾何題目印漏一個Point G,然後手寫番個G字響圖形既某一點,再同學生講G點唔係咁易搵到,lol.
當年上堂確實聽過Wilson Liu搞過啲自己get唔到既gag,依家諗番起可能當時佢就係講緊鹹野,lol.

講番一幕幕昔日上堂既片段,回憶及味道就出番晒黎.
當年多數叻人都會走去現代補Dick Hui,因為佢會教得精啲好啲.而Koopa Koo就仲高level,完全唔同層次,一般學生亦唔係咁易跟得上.
或者我果陣去補Dick Hui的話,可能Core會拎多粒星,不過果陣自己心態又唔係咁aggressive,主要係費事煩,費事專登走去現代一轉,lol.
唉,補習啫,都差唔多啦,平時返學已經好悶,補習可以響個舒適啲既環境學習,最緊要開心啫.
上Wilson Liu堂,定期改善下自己既數學,間中聽下Wilson Liu吹水車大炮,又睇下佢柒咕轆既畫面,都係有趣之事.
多謝Wilson Liu曾經出現響我中學奮鬥既年代.祝Wilson Liu跟太太同小朋友生活愉快.

相關文章：
英皇數學Wilson Liu 退出補習界 | LIHKG 討論區 - LIHKG.com
https://lihkg.com/thread/2168341/page/1

昔日文章：
那些年，我們一起補的Ken Chan
https://raymondsoso.blogspot.com/2017/01/ken-chan.html