無盡旅途 Endless Journey

15/12/22 陰

相隔十幾年,美國史詩式科幻電影阿凡達續集,阿凡達：水之道,正式登上大銀幕.
當年細個無錢入場睇IMAX,結果去到今年前排先入場睇番上集.
不過咁樣仲好,起碼等我清晰地了解番上集劇情,唔怕自己隔左咁多年會唔記得.
話說開畫首兩日入場,會送海報同紀念門票,反正都係自己睇呢齣超過三小時既長片,索性揀平日朝早去Megabox睇.

延續上集故事結尾,地球人類即係納美人稱為既天空人,沒有因為上次打敗仗而放棄爭奪潘朵拉星.
相反,佢地繼續進行科研,研發更厲害既阿凡達身軀,將自己化身成納美人,再次企圖入侵.
上集大反派角色將軍,今次以主角Jake Sully為殺害目標,打算殺死呢個民族領袖,取得勝利.
呢個位其實有啲奇怪,因為堂堂大將軍,應該以大局為重,佢最主要係想侵略潘朵拉星奪取重要天然資源,其實佢繼續攻打納美人就得,我唔明白點解佢要對主角窮追猛打.
Anyway,Jake知道佢一家人成為將軍既目標,決定離開民族,前往投靠海洋族人,奈何最終都係要同人類開戰.

今次個戰場由森林變成海洋及空中,又有另一種觀賞角度.
3D效果黎講都算正常多,都唔錯既.通常係水底或者偏靜態既畫面,效果最靚.
睇住Jake一家人學習同適應響水底生活,個故事都幾有趣,同埋會多左新既橋段.
有啲人就話套戲悶,我全程應該係打左一次喊露,主要原因可能係睇早場,haha.
平心而論,我覺得個劇情的確有少少拖長左既,尤其前頭果part.
本身呢套係水之道,預左故事係響水中發生,但一開頭睇左好耐都仲係響森林,搞到我都少少一頭霧水.
不過本身故事係吸引同埋都幾刺激,睇兩班人鬥智鬥力地開戰係精彩既.

同埋呢部電影再次表達番人類同大自然既關係,我地應該點樣去善待我地既天然資源...
動物都有靈性,我地要點樣同動物相處...上天給予我地資源,同時亦可拎走...呢啲都好值得我地反思.
睇番資料先知原來Avatar足足籌備五集咁多,拍到2028年,咁我就拭目以待.