15/12/22 陰
繼上月去左M+之後,蠢蠢欲動,參觀埋香港故宮文化博物館.
星期三免費入場就唔輪到我架喇,用埋旅遊平台既積分,以超平價買普通門票入場就算.
當年故宮博物館響爭議聲中落實興建,依家成為西九文化區其中一個重要地標.
故宮博物館展示九百多件來自北京故宮博物院的珍貴文物,有啲就由收藏家轉贈.
博物館正門外係一大片空地,除左俾人打卡,相信平日都有唔少團體參觀集合之用.
確實,今日平日下午,我見到有不少本地長者旅行團,以及小學團體參觀,我仲見到自己小學母校既學生添.
再加上參觀途中不時遇上導賞團,其實平日行故宮都幾熱鬧,絕對唔冷清.
所以,本身諗住揀平日俾錢入場睇,避開週末既人潮,呢招響故宮都未必work.
博物館普通展覽有七個展館,展館面積比起M+相對無咁大,走動空間亦少啲啲,無咁寬敞.
不過展品就明顯多啲,但或者我對中國文化真係興趣不大,響我眼中,來來去去都係碗呀碟呀陶瓷呀果啲.
真係關於皇宮內既生活或者皇帝會用既物品,先會駐足較長時間.
不過睇左幾個館,印象最深刻係我睇左無數咁多座時鐘,啲時鐘又真係幾精緻幾金光璀璨既.
至於互動環節上,感覺故宮都無安排得咁多,唯一特別係有個位俾訪客瞓低望上天花,幻想自己發夢夢見母后,lol.
雖然感覺上故宮個展覽規模無M+咁大咁多樣化,但都算行得舒服,睇完一個館就可以走出黎坐下.
上層既長樓梯亦係打卡位,仲有兩個戶外展望台,望出去維港幾寫意.
底層既紀念品店就好細間,後面仲有個圖書館,外圍就有一排餐廳.成座故宮大概就係咁.
上次行M+連埋紀念品店行左足足三個鐘有多,今次走馬看花式睇故宮文物,展館就個半鐘搞掂,連埋其他公共空間就兩個鐘完成.
既然仲有時間,一於行埋出面西九藝術公園,順便睇下今年西九棵聖誕樹.
文章標籤
全站熱搜
