21/12/22 晴
四年一屆既世界盃,難得有免費電視直播,加上球賽時間都唔曳,我地呢啲忽然球迷都要趁下氣氛.
今屆小組賽有不少爆冷賽果,弱隊反勝強隊,真係Impossible is Nothing.
去到尾段,克羅地亞對日本,兩隊都中意,是旦一邊嬴都好矛盾,結果克羅地亞嬴出點球擠身八強.
去到八強戰,全部人都唔睇好佢地,覺得巴西雖然唔算表現突出但都會嬴到,點知佢地力克巴西守和,再次憑十二碼取得勝利.
克羅地亞雖然踢保守波,但往往先落後後追平既局面,令人睇到熱血沸騰,更加想支持佢地.
終於去到對戰阿根廷,真係無得好講,全球都等緊美斯捧冠軍,是旦一邊晉級都係奇蹟.
結果阿根廷打決賽,克羅地亞打季軍戰.或者呢個係對於球迷黎講,當刻最理想既結果.
克羅地亞響季軍戰對摩洛哥,唔敢對克羅地亞抱予好大期望,但克羅地亞都交到功課,憑早段進取既攻勢領先,順利嬴得季軍.
見到克羅地亞球員嬴季軍,仲開心過上屆輸決賽攞亞軍,都係人之常情.
不得不提老將摩迪,又稱魔笛,響場上發揮穩定出色,無論前場後場都有佢既蹤影,跑上跑落,真係勤力到痴左線.
佩服佢站在球場上睇得通透,好識得策劃攻勢,識得分波俾人,扮演住重要角色.
因為幾年前去過克羅地亞,實在太中意呢個國家同埋人民,覺得even球員個球品都好啲和善啲.
另一邊廂,阿根廷今屆亦係神奇之旅,由第一場分組賽馬失前蹄輸俾弱旅,大家都不予厚望,佢地慢慢調整,回復番水平.
決賽對法國,頭70分鐘都掌握比賽節奏,取得大部分控球權,美斯踢得好輕鬆,法國隊即使麥巴比在陣都完全發揮唔出水準,完全唔似睇緊一場世界盃決賽.
不過,70分鐘後球隊輸左球十二碼,之後突然再俾麥總勁射多一粒,於幾分鐘內追平,完全嚇到人呆左,反應唔切.
我相信阿根廷球員以至球迷都頓時被淋左盆冷水,之後形勢即刻逆轉,法國隊回復攻勢,幸好守到完場.
本身以為二比零甚或再增添比數,點知要打加時賽,美斯於中段射入關鍵性一球,協助球隊再次領先.
但不幸去到最後幾分鐘始終敵不住,被搏到十二碼,麥總再次操刀射入,完成帽子戲法.比數再次拉平.
十二碼,真係講運氣,但阿根廷門將馬天尼斯仲有撲十二碼既高超技巧,唔止一次捉到路,加上法國有球員射失,終於阿根廷確定嬴出呢場賽事.
果下應該全球球迷都為之動容,美斯苦等八年,終於一嚐世界盃冠軍的滋味,而阿根廷亦事隔36年嬴得冠軍.
呢場賽事嬴得唔容易,但就十分精彩,令人緊張到癲,睇到心肝仔卜卜跳.
踢埋加時兼十二碼食全餐,可以話,睇到今場波係球迷既福氣,真係有今生無來世.
本身應該一點踢完唔駛睇捧盃就瞓得,但俾場波搞到咁熱血,結果睇埋完整頒獎,成三點先瞓,lol.
不過,四年一次就算啦,始終美斯捧盃都開心既,相信全世界,甚至部分法國人都為佢感到高興.
真係唔到最後一刻都唔知結果係點,今屆世界盃有咁樣既發展都幾令人意想不到,唔知下屆又會係咩境況呢.
