無盡旅途 Endless Journey

21/12/22 晴

闊別九年,終於有幸再次入場睇陳奕迅演唱會,Fear and Dreams Eason Chan in Concert.
上一次係Eason狀態最低時期,質素一團糟,之後經歷過社會不穩及後續既政治事件,疫情,終於黎到復常之時成功開show.
搶飛越來越困難往往要靠黃牛,今次用較抵既價錢買到第9行較前既座位,側面睇concert.
坐得咁前真係第一次,以前去紅館,從來都係走廊向上爬,都未試過向下落,連走廊level既位都未坐過.
慶幸今次俾貴飛都算值回票價,亦終於係一場我期待已久既演唱會.

第一幕2001太空漫遊,用到威也吊個dancer上半空,雖然唔係好大陣象,但配合大型LED屏幕既太空動畫效果,都幾有睇頭.
無諗過睇場演唱會都有呢啲花臣睇,幾surprise同賞心悅目,直頭有少少喜出望外.
同埋2001太空漫遊本身配樂幾型,用黎做開場都幾岩feel.

今次Eason既演唱會沿用三面台,舞台特技效果繼續減到最少,主要都係靠LED,所以整體都係表演風格為主.
本身Eason以前好多野講,演唱會不停吹水,今次佢足足忍住唱左成廿首歌,差唔多最後先講幾分鐘野.
加上feel到佢今次有少少留力壓住把聲去唱,以免影響之後既演出,所以我感覺仲未聽到最真實既Eason.
同埋佢今日有好幾個位都少少甩左,亦有走音情況,佢自己都唔滿意.
本身聽見佢唱Aga作曲既一個靈魂的獨白,十分期待,不過唔知佢唱得太有情緒定忘記歌詞,都唔係好唱到,有啲失望.
不過無論點,雖然佢有啲位表現一般,但亦有精彩既部分,好睇既部分都好正,拉上補下.
例如Sue幾中意既一首sidetrack作品黑洞,覺得好好聽,我就覺得四季個視覺畫面好有意境.
當這地球沒有花以及想聽,都係比較早期既作品,呢啲sidetrack都值得拎出黎唱.
黑夜不再來就經典之作,毋須多介紹,大家都拎晒手機出黎拍低.
至於快歌方面揀曲都唔差,時代巨輪,忘記歌詞,都令大家聽得投入.
最尾既快歌medley,當中既美麗有罪,隨意門,第五個現代化,重口味,都係令人激情起舞.
可能因為坐得夠前,今次終於high爆,企埋起身一齊fing手,好正,好開心.
終於重拾以前年代睇演唱會既感覺,近年啲香港人睇show個個都好怕羞好靦腆,搞到表演者都hyper唔到.
今場啲前排觀眾反應,開始時比較冷漠,去到中後段多番啲出名歌曲後先開始興奮,所以後段比較好睇.
每晚一首獨特既encore歌曲,好驚佢會唱首我唔識既歌,結果抽中左葡萄成熟時,係2005年作品.
雖然唔係我至愛歌曲,但都係街知巷聞作品,可以一路聽一路唱,都算十分滿足了.

整體今晚場concert係好睇同值得睇既,失準既位置有其他更加精彩既部分cover番.
雖然今次唱比較多sidetrack作品,我本身都有一堆歌曲唔識,但事前溫定書,到現場聽都覺得唔錯既.
而且果啲冷門作品本身都唔算唔好聽,Eason亦唱得ok.
響唔邀請嘉賓既情況下,可以獨力由八點半撐到十一點幾,唱左咁多首歌,都真係好犀利了.