23/12/22 晴
今年既生活回顧其實有啲難寫,因為好似無乜特別野做過,而且去到近期都忙於籌備婚禮既野,日日都好忙做好多野.
所以今年都遲左少少寫呢篇回顧,一來無時間,二來的唔起心肝寫,haha.
今年係電影年,睇左好多套香港電影,支持本地影壇.
本身我自己都睇開港產片,但唔知咩原因,社會突然興起呢個熱潮,都係好事黎既.
工作繼續忙碌,生活都唔係輕鬆.少左旅行(雖然我唔熱衷),少左去啲新地方,感覺都枯燥乏味啲.
不過,整體呢一年都過得開心既,同埋到左下半年時間都算過得快.
雖然工作唔易,但識到班玩得埋傾得埋既同事,返工放工都可以放鬆心情.
幾年前生活回顧曾經提及,能夠相識一場都算係緣份,緣來緣盡,都要睇得開.
準備迎接人生新階段,生活上的習慣都慢慢改變,亦未必再有時間寫blog.
寫左十六年blog,當中有高有低,有時好多野想分享,有時就無咩題材食白果.
十分懷念當年Yahoo! Blog既年代,網誌曝光率高,網友回響都不少,依家個環境不復再.
新一代亦唔再以寫blog或日記為興趣,文字既價值減低.
取而代之,係一幅幅即時相片story,極其量係一段十幾秒既短片.
一張相,加個caption,就表達左當日既心情.一切變得簡單化.
呢個轉變,有好有唔好.但無論如何呢個係時代巨輪,唔輪到我地阻止.
一直堅持寫blog,由中一寫到中六,大學畢業...估唔到投身社會之後,都仲維持到六年.
Blog本來係紀錄自己既生活,慢慢就變成一種習慣,但我唔想佢變成一種工作,一種為做而做既事.
幾年前已經有打算,當經營到心灰意冷,我就會響年尾完結呢個人生一個馬拉松式既production.
做到十年,當然開心.如果可以做多個十年,梗係更加圓滿.依家堅持左十六年,都已經好難得.
近年逐漸減產出blog,然而常規音樂節目以及電影影評仍然堅持.去到今年年底,星期日好歌做夠300集,都係時候完結.
除非係超級特別記低或留念既題材,例如旅行,或者黎緊人生大事,先會ad hoc響blog出post,否則黎緊唔再恆常寫blog.
當然,有啲排期未出既blog,會接住繼續出埋,之後就soft closing.
多謝曾經瀏覽呢個blog既大家,一直珍惜呢個抒發既平台或者空間,亦珍惜同大家互動既機會.
老套一句,天下無不散之筵席,我地總有機會響blog再見.
