13/1/23 雨
(註: 今篇主要講述搞婚禮既經歷,有關婚禮內心感言,請留意下集~)
結婚係其中一件人生大事,尤其我同Sue既婚禮由2019年計劃到2023年成真,足足橫跨五個年頭,飲宴都postpone左接近兩年,要講感受真係一匹布咁長.
本來2019求婚果年,好多野都準備得如火如荼,好有憧憬,提早book定,諗住2021年5月22日結婚,中間有咁多時間可以慢慢搞,同埋預一個summer去歐洲影pre-wedding.
點知轉個頭到2020年就遇上疫情,通關遙遙無期,打亂左我地既婚攝計劃,結果間接拖遲了big day及婚宴.
呢幾年疫情時高時低,響呢段時期擺酒根本好risky.有朋友剛剛撞正防疫措施放寬既時間擺酒,可以順利完成婚禮,但亦聽聞唔少最後搞唔成婚禮既個案.
由於已經拖到無得再拖,再次搵黃大仙師傅擇日後,最後決定big day定於2023年1月8日.
野食攤得太耐會凍,呢壇project同樣,本來應該年中就kick start落手開始搞,但最後自己只係做左啲前期初步既工作,無認真準備.
結果拖到年尾,先開始chur爆自己同Sue,周圍撲婚禮既雜項,book唔同種類既野,連婚紗都幾乎到last minute先confirm.
咁岩12月中Sue要出trip工幹,得番我自己一個響香港,唔識落決定,更加拖慢左進度.
終於,好多野都係去到12月中後,先成log過淘寶或者book,同埋成個rundown,以至婚宴既流程細節,播歌音樂等,先陸續開始處理.
好多新人可能一早,起碼一個月前,會搵攝影團隊傾rundown,搵化妝師試妝,我地就到前一星期先同各個parties傾,幸好最後都傾到個大家ok既方案.
最癲既係成長片段,辛苦晒Sue係big day前幾日先整好,趕唔切預先交俾酒樓,要big day當日先過片,如果段片播唔到就GG.
仲有好多野因為未試過搞婚禮又未試過做兄弟,所以唔肯定點做,都係摸住石頭過海.
婚禮前果個零禮拜,幾乎每晚都係凌晨兩三點先訓,因為日頭返工傾唔到,就唯有晚上趕工做.
因為唔想勞煩兄弟姊妹,big day前幾乎所有preparation都係我同Sue兩個人自己搞掂.
最癲首先係回禮禮物,自己包左280個禮物袋同打結,Sue就負責扣上喜字紙牌,果兩三晚簡直係血汗工廠.
仲有淘寶既相簿,姓名木牌等物資,都要double confirm趕得切送黎香港,期間一直擔心內地疫情不穩無啦啦又封關,真係好險.
最難搞係rundown,搵左各路人馬既source,但花多眼亂睇到頭痛,都係索性自己重新諗過rundown出黎.
分工方面,寫得detailed大家就易跟啲,但亦都諗餐死,未必個個人都分到野做,所以都唔係容易.
仲有,要應付工作能力及服務表現奇差既vendor,真係死左我地好多腦細胞,亦完全浪費緊時間.
好多朋友同事問我,臨近big day,有無緊張,我一概回答,係覺得煩惱多啲,haha.因為真係太多野搞,而且係濕星野,多到你預計唔到.
所以,我同Sue係好想快啲去到big day,過埋呢一日,咁就一天都光晒,lol.
因為師傅擇日安床比一般情況早,結果我地提前住多左兩晚酒店,但亦因此多左時間執野準備,慶幸最後都無野漏帶.
夜晚上頭,大妗姐寶姐既帶領下,同爸媽一齊食湯丸,呢個moment忍唔住喊左出黎,回想起父母既養育之恩,果一刻心情係感動.
Big day當日,就辛苦晒一眾姊妹兄弟,一朝早就開始準備,按照rundown schedule行動.
我地出門入門時間都靚,唔駛一大清早就開始,而且都係同一酒店完成,影相就方便啲.
接新娘遊戲固然好玩,之後就輪到自己對住老婆講情深說話.
平時去飲,睇早拍晚播(SDE),見到新郎既speech都無乜投入感,但去到自己企響呢個位講,就有好真實既體會.
仲有雙方家長敬茶環節,都係感動場面,大家都忍唔住眼濕濕,但又好難控制自己.
響cc staff can食完飯,就響百萬大道影外景,雖然無道具,但夠人腳夠多pose,自然玩得好開心.
去到黃昏響尖沙咀酒樓空中花園證婚,終於黎到簽紙儀式,真真正正要同Sue結婚了!響一片大風之中行禮,感覺有少少匆忙,因為新娘實在太凍.
另外,律師都提醒要用手按住張紙,萬一張紙唔小心吹走左出去就GG,笑死.
去到夜晚,我自己感覺時間過得快啲,不過都係keep住好忙多野做.
開席前同賓客台上影相,又要敬茶,跪低敬左成半個鐘,好L癲,真係辛苦晒老婆.
March in行得有啲cap,不過feel到件事係浪漫既,Sue揀First Love做背景音樂,岩岩食正近排hit既日劇,而且都符合Sue係我既初戀.
多謝攝製隊拍左條好好睇既SDE,原來新郎新娘係會開張凳坐響正中,一齊睇段片.
搞咁大場酒席,最後目的都係想同各位親戚好友影相,到尾段團體照見番大家都好開心.
雖然8點先入席,但最後10點半後就上晒菜可以散席,真係efficient.
搞完一整日,連chur十幾個鐘,完成Sue & Raymond's Wedding呢個project.
執左一大堆野去酒店及酒樓,打爆左架車既車尾空間,完場後又塞爆架車帶番屋企,返到屋企真係暈低,haha.
成日都會諗,為左結婚簽紙,搞一大場龍鳳為乜,但人生就係得呢一次先咁大龍鳳,都頂硬上啦!
