無盡旅途 Endless Journey

16/1/23 陰

有部分結婚及big day既感言,都響當日同大家講左.至於內心就仲有一大堆感受好亂,都唔知點樣梳理.
本來諗住費事再寫blog,由得當刻既心情及情感留響心中,但最後都係決定簡單分享下.

婚禮輾轉推遲左兩年,上年亦開始同Sue一齊住,所以big day前後既生活其實無乜大轉變.
心理上,本身同Sue一直咁sweet,簽左婚約,感覺就同Sue再親近再close啲,互相確認對方係人生既另一半.
接新娘,行禮果刻,二人互相對望,有一種一齊經歷過高低起伏,最後修成正果,苦盡甘來既感覺,確實係眼濕濕好感動.
的確呢八年半以來我地經歷得太多,雖然我地少鬧交但要維持一段關係都唔容易.
多謝Sue對我既遷就及愛護,餘生就讓我繼續好好照顧老婆你,一齊幸福美滿咁生活下去.

要多謝爸爸媽媽既養育之恩,仲有親戚們既看顧及照料,我一路成長都咁愛錫我.
不論能否出席婚禮,我都深深收到你地既祝福及心意,都係咁感激你地.

要多謝我幾位義不容辭既好兄弟,Sunny,Allen,阿乃,當日爽快答應幫手,even未有做兄弟既經驗.
Nana一下就應承令我更加surprise,辛苦佢湊女百忙中抽時間黎,無以為報.
開頭擔心得四位兄弟唔夠人手,但最後全日都無甩轆出岔子,大家都好firm,可以話係大成功.

仲有big day當日既工作團隊,包括photographer,videographer,化妝師,司儀,都十分專業,提供好好既service.
感覺有呢班人一齊,佢地唔係淨係黎工作咁簡單,而係真心地陪我地度過呢一日,甚至作為見證.所以都好開心.
特別係攝製crew,知道佢地一朝早就要應付好talkative好活躍既姊妹團,真係辛苦晒.
有攝製crew既指示,我地先可以capture到最靚最精彩既moment.
仲有晚宴emcee,要應付我呢種傳統大家族擺酒形式既婚宴絕對唔容易,好彩有請emcee幫手,否則都好難控制場面.
仲有酒樓上上下下,以及其他製作公司團隊,都促成左今晚圓滿既婚宴.

以前聽新人分享,都話big day當日被人捉去做呢樣做果樣,唔知自己發生過什麼事,感覺係斷片一樣.
我都對big day前一日既事情斷晒片,搞婚禮的確好chur,事後亦未必有印象當日既細節,因為流程實在頗多.
不過,當刻既心情同感覺,既期待又興奮,相信會一直保留於心入面.