24/1/23 涼
正當網片開始紅起黎,就偏偏遇上疫情.苦等幾年,中間經歷過幾次因為政府突發防疫措施而搞唔到show被逼取消,到最近終於見到曙光.
微辣之前響香港搞左棟篤笑同音樂show都無入場,今次搞「一年之計搞乜春」魔術劇,見有六毫子同加蔥,玩黑店系列,就支持一下.
本身幾期待睇呢場show,終於現場見下佢地,不過到第一場開演後,網上就一面倒負評,將呢個舞台劇批評得體無完膚.
我慶幸睇左第二場尾場,當晚個show睇得出佢地有因應第一晚既comment做過不少調整,希望盡量做得smooth同好睇,唔會有冷場或尷尬既moment.
不過整體以Star Hall呢個規模既performance黎講,佢地既production確實比較幼嫩.
正如有啲網民所講,佢地目前既能力應該暫時繼續響Music Zone果種細場搞住先,除非請出面既production house製作.
今次叫得做魔術劇場,裡頭大部分魔術都係N年前極之老套既把戲,再based on呢啲tricks加添故事,但又唔係連貫.
響得Star Hall搞,大家又俾咁貴門票入場,都會expect有啲大型甚或刺激既魔術睇,而唔係連中學生都識既技藝.
你問啲橋段係咪真係唔好笑呢又唔係,其實成晚都睇得開心,只係對比其他團體或者Youtube channel搞show,無咁精彩.
故事唔連貫,個別內容不明所以,核心元素fail,都係呢場show失敗既原因.
惟獨靠一眾藝人既個人魅力或能力,大家各自contribute自己既亮點,獨當一面,先可以撐得起成晚.
尤其係豪dee,睇佢臨場轉數發揮得非常厲害,如果將來可以睇佢solo演出相信一定精彩.
大家都認為咁多位演員都好努力,做得好好,表現已令觀眾收貨,只係內容上同編劇導演方面有好大既改善空間.
同埋今次微辣揀既時間唔係幾好,響正年初二三,唔係人人得閒走去睇show.
啲人話現場大量空凳,又要降價散飛,我尾場睇算係坐滿既,當中有幾多係免費sponsor飛就不得而知.
相信微辣仝人都會認同,大家係真心喜歡支持微辣,先會咁用力批評.
衷心祝願佢地獲取今次寶貴經驗,下次搞show會有令人嘆為觀止既演出.
Btw多謝第一晚既觀眾大力diu大會,尾場坐balcony觀眾席既我都成功搶到紀念品,yeah~
(電子場刊: https://qrco.de/bdeIef)
