12/3/23 陰
睇番blog先知原來已經有成四年幾無入去大嶼山愉景灣,今日去開東涌shopping,就想一併去埋.
呢幾年呢邊變化都好大,就連東涌站巴士總站都翻新埋,愉景灣巴士站頭都由出面普通上落客區搬番入巴士總站,不過車費加幅就好勁.
巴士基本上好快,15分鐘就入到愉景灣,今次因為泊左車響東薈城,所以要東涌入東涌出,想從愉景北商場直接出市區就麻煩啲.
上次黎愉景灣巴士總站仲係工程中,依家呢度已經完全翻新晒,開多左一期商場,天台變成巴士總站.
新翼商場唔大,得兩層,地下樓層樓底幾高,幾舒服.呢度鋪頭唔多,都係基本既民生配套.
最主要係多左個溜冰場,個場都唔算細,假日算多人玩,當然位處偏遠地區,就唔係好逼啦.
本身以為個新既溜冰場complex係隔左條大馬路響對面,原來直頭貼住原先果座商場咁興建,咁都好方便.
至於出面既D'Deck餐廳群就更加熱鬧,可能今日假日所以零舍多人.記得上次黎好似係平日,冷清勁多.
同埋撞岩今日係每月一度既市集,有文創藝術野,生活野等等.行就唔會仔細行,但就感受下個氣氛.
始終呢度比較多外國人居住,所以market個vibe都偏向international啲.
除左商場仲有沙灘同短短既海濱走廊,都係每次黎親必定既影相打卡位.
返去站頭等左一輪先有巴士前往愉景北商場,呢度呢幾年就無乜點變.
心心愛情鎖仲響度,隻木船就唔見左,海濱白禮堂依舊多人影相.
同埋經歷完三年既疫情,turn out暫時無機會入住呢間愉景灣酒店避世.
至於巴士站對面既新樓意堤,當年經過仲興建緊,依家已經入晒伙.
始終愉景灣呢度比較異國風情,所以不論住宅或者商業廣場都幾靚幾有feel,響度活動既人都好chill.
因為要坐返東涌巴士,所以除非再俾多6蚊轉車,否則就要步行穿過隧道去山頭既另一面,響隧道口坐番東涌車.
響愉景北呢邊行經隧道有暗斜向上,不過都未至於辛苦,反方向玩可能會比較好行.
好少於車路隧道中步行,呢個體驗都幾得意.好彩趕及巴士,返得切東薈城claim埋免費泊車添.
愉景灣話大唔大話細唔細,我自己幾中意黎呢度半日遊,或者避下世.但如果居住就不了,haha.
唔知下次又要幾耐之後先會再臨了.
