21/6/18 陰
捷克之旅 2018 Sue & Raymond 1 - 4 June 2018
#thesweetestcoupleineurope
Ep.1 終於唔駛坐廉航
Day 1 - 1 June (Fri)
說好的東歐之旅,計劃已久,曾經諗過太貴同埋唔夠假期唔去,亦差啲改期轉去另外一個地方.但最後,由book機票果一刻,終歸confirm左呢個跨越半個地球的旅程.
可以話係長途,亦可以話唔係,因為的確今次去到歐洲好遠(係我同Sue人生第一次踏足歐洲),但其實我地又唔係去左好耐,頭尾連埋搭飛機十日都無,實際上落地玩只係約八日,所以其實又唔算好長.
一直都講緊東歐東歐,去到出發前先驚覺原來克羅地亞屬於南歐,咁呢個trip仲叫唔叫東歐之旅.
你問我係咪好熱衷於東歐呢類型既地方,其實我就對歐洲國家唔多熟悉,有時會覺得呢種咁有文化風情既地方,應該等我大個啲再成熟啲先去,先有真正及更深刻的體會.
不過既然Sue咁想趁青春留倩影,加上我對於呢啲新地方都有興趣,所以就算差緊一日假期,skip左匈牙利,都照樣出發去東歐啦.
我地既行程是咁的:
- 由香港途經曼谷飛去杜拜,再轉機到捷克布拉格 (EK385, EK139)
- 布拉格坐內陸機去克羅地亞南部Dubrovnik (QS1084)
- 由Dubrovnik坐長途巴士向北玩,包括Split,十六湖Plitvice,最後係首都Zagreb
- 最後由Zagreb飛番去杜拜,再轉機直達香港 (EK130, EK382)
話說仲係星期五working day,提早一小時收工,接埋Sue一齊響灣仔搭機場快綫接駁巴士,去香港站坐機場快綫到機場.
第一次坐機鐵坐足全程,梗係用盡佢既優惠,帶埋行李搭佢部免費shuttle,好快就去到香港站,一落地庫就係月台.
因為響放工時間之前來到,所以任揀座位,車廂新淨又靚,真係二十分鐘就到達機場,快到一個點,不過早左到都要等地勤開櫃檯處理check in,入到去再去意粉屋食少少野先.
好耐未試過響番Terminal 1 check in同入閘,亦終於唔使再坐廉航,我地就黎坐廉航細機坐到連飛機有電視睇都唔記得架喇.
揀選Emirates阿聯酋航空除左因為呢間出名服務唔錯幾好搭之外,Skyscanner眾多airlines入面,佢既價錢係最平.
對我地最湛新係今次可以一嘗空中巴士A380的滋味,雖然坐唔到上層商務位,但呢隻機又大又靚,連座位都闊過一般波音777.
然後Emirates與別不同之處係佢有外置鏡頭睇到由機頭,機頂,機底望出黎既景象.用黎睇客機升降都幾有趣.(777客機就無機頂畫面)
乘客會被派發一套耳筒,一張毛墊,一個枕頭,另外空姐起飛前會派menu,可以率先諗定食咩.
可以肯定既係Emirates無豬肉食既,所以好多餐都係雞,一係就食魚或牛,亦好彩遇到有一餐試下羊.
Emirates飛機餐被認為算係咁多間airlines之中做得比較好食,而的確啲野食係易入口既.
除左個硬掘掘既麵包一定唔食之外,其餘都食到大半.值得一提Emirates既甜品零舍大份,份量拍得住主菜,邊食得晒,haha.
Emirates既視聽娛樂系統叫做ice,代表information, communication, 以及entertainment.
娛樂方面,電影多Bollywood類別,西片都多,特別係英雄電影,亞洲電影就一般,無乜吸引既選擇,亦唔係好多電影有中文字幕.
反而音樂方面就幾令我驚喜,因為都收錄了不少香港的知名歌手,連出道無咁耐既AGA都有,真係估你唔到.
遊戲方面,我略略開過幾隻game黎睇睇,覺得Emirates既遊戲都適合大人玩既,唔會太低B淨係岩細路玩.
加上咁岩出發呢程機既A380係配以特大高清熒幕,其實成件事係夠做有餘,都無得再奢求啲咩.
唯獨是Emirates聲稱空中支援兩小時20MB免費wifi上網,但我試過好似唔多work,唔知係我唔識set定咩.
出發呢一程機特別在會繞經曼谷停留,機上大部分乘客都落晒機,隔一陣就有另一班旅客登機,再飛去布拉格.
呢度係花多左個幾鐘頭時間既,亦打斷左我地既休息,係訓唔到既,要當捱通宵,撐到去杜拜,轉機後先可以試下響機上訓教.
