無盡旅途 Endless Journey

4/5/15 晴
東京之旅 #thesweetestcoupleintokyo Sue & Raymond Episode 16 (完結篇)
後記 - 旅程後感
都響facebook洗左版接近兩個月(笑),始終要作一個收結,以旅程後感作為東京之旅遊記系列既終章.
對日本人既最大觀感,就係概括番前兩集所講,佢地工作時或者生活上都甚有禮貌,非常好客,恭恭敬敬,笑容滿面.
但唔知點解,一落到去地鐵站,就會變晒冷酷,黑晒面,唔會同其他人有眼神交流.
我地分析,可能係因為佢地日頭做野要夾硬用一個咁友善既approach去招呼人,做左成日emotional labor好辛苦,所以一放工,就打回原形,變番一個有正常情感既人輕鬆番,再唔須要介意其他人既目光.
如果係咁,都幾悲哀,係成個文化形成佢地咁樣,日頭同夜晚可以有咁大分別.
不過睇番日本人造既產品,你會發現佢地真係好有心思,為顧客諗得好仔細.
尤其零食包裝方面會整得好靚好得體之餘,個設計真係有實質作用.
例如下圖所示,一包Pocky,佢唔係預你好似平時咁,響最頂既齒口撕開,而係響中間有個虛位俾你打橫咁搣開,因為呢樣容易啲打開個袋拎啲朱古力條出黎.
又好似我地最中意既手信東京芝士條咁,佢又係響中間撕開,然後佢設計到俾你一格格咁推條蛋糕出黎咬,咁你隻手就全程唔會接觸到蛋糕,一來衛生,二來你隻手唔會整污糟.
我覺得日本人真係心思細密到一個點,不得不叫人佩服.
當然,咁樣既額外包裝會唔會引起浪費唔環保,就睇下你點睇喇.
日本人亦都幾樂意幫人,我地試過響街問路,路人就算語言溝通唔到,但都盡力表達佢想講既野出黎.
不過無諗到東京咁大個城市,仲要係首都,但英文水平都係比較低.
基本上你用英文同佢地交流既話,每次只需要講一隻字就得,用完整句子佢地唔會聽得明.
例如你去餐廳想攞餐牌,就咁同佢地講Menu,佢地就會明白.食完埋單走,講cash,佢地就會知你想俾錢,lol.
對東京既觀感,就係繁華大都市,個scale同香港相近,景點都有少少商業化,但就無香港商業得咁嚴重.
但我地就幾擅於plan行程,可以做到每日早上行戶外景點或公園,下午行室內商場購物,晚上就去食好野,臨返酒店前去藥妝店掃貨.
日本人有一樣野好叻,就係佢地好識得發掘當地local特色既野或地方,就打造成一個景點俾遊客睇.
有好多景點,其實只係短短一條街道,例如專食宵夜既思い出横丁,甚至澀谷站外一個忠犬八公像(一隻狗既銅像,其實當中有段故事可以搜尋下),咁都可以成為旅遊點,響香港應該無乜可能.
但就正正有呢啲地方,先呈現到日本人既生活特式及態度.
響東京既六日之旅,我地都覺得玩得最開心既係第四日,淺草－＞上野－＞東京都廳－＞新宿－＞池袋.
可能因為我地都好想去參觀雷門,仲見世通及淺草寺,同埋呢度應該最能夠反映日本傳統文化既一面.
另外,我地都係啲中意行公園去outdoor地方既人,所以響上野公園沿住個湖散步,覺得好舒服.
有野行有野睇,仲有得響番新宿大本營shopping買鞋,夜晚仲有得食美登利活壽司,用iPad點菜,有車仔載住啲壽司過黎,好得意.
如果要再作improvement,可能係cancel disneyland,調為響東京圈行街,或者應該加多一日行程去街,咁其他行程就唔駛咁趕咁走馬看花.
聽fd講台場好似無特別浪費時間,而且台場啲野比較新,無日本果種風格,所以我地無去到台場都可能個明智之舉.
雖然短期內唔會再去東京,甚至日本,但假如有朝一日重返東京,我地會想去下東京近郊果啲,感受東京悠閒寧靜既一面.
講到最難忘既片段,我就覺得行東京鐵塔係最浪漫既,因為夜晚上去睇夜景,觀景台本身無乜燈光暗暗地好有feel,望出去既風景雖然因入夜唔太清晰,但我第一次響高空睇夜景,望落民居及街道都感覺唔錯.
而且響鐵塔外影相,都覺得著左燈既鐵塔好宏偉好璀璨.我同Sue以鐵塔作背景合照都覺得好浪漫好甜蜜,鐵塔見證了我地既日本之旅!
另外,響新宿御苑見到大大棵櫻花,果下都係我地其中一個最深刻既一幕,唔捨得走.
Anyway,最緊要係同SueSue一齊去旅行啫,去邊度做啲咩都咁浪漫, the sweetest couple in tokyo!
美國相識,香港發展,日本旅行...希望將來繼續延續我地既愛情旅程,再去更多新既地方!
完
東京之旅 #thesweetestcoupleintokyo 9 - 14 March 2015
Day1 --- 新宿
Day2 --- 築地－＞皇居東御苑－＞東京一番街－＞銀座－＞東京鐵塔－＞六本木
Day3 --- 明治神宮－＞原宿及表參道－＞澀谷－＞新宿
Day4 --- 淺草－＞上野－＞東京都廳－＞新宿－＞池袋
Day5 --- 迪士尼樂園
Day6 --- 新宿御苑、新宿
重溫東京之旅系列各集內容
http://raymondsoso.blogspot.hk/search/label/%E6%9D%B1%E4%BA%AC%E4%B9%8B%E6%97%852015 或
http://raymondsoso.pixnet.net/blog/category/3466234
      

27/4/15 陰
東京之旅 #thesweetestcoupleintokyo Sue & Raymond Episode 15
後記 - 交通篇
響日本既交通,鐵路既角色舉足輕重,反而陸上交通工具唔算係主要.所以我同Sue淨係搭過地鐵,都無搭過其他.
第一集序言已經講過我地係用3-day subway pass,搭都營地鐵及metro,而唔係JR山手線.(原因請閱第一集內容)
不過如果你真係唔想諗行程諗得咁仔細既,山手線都係個簡單既好選擇,而用suica卡(俗稱西瓜卡)搭JR就會有雞水折扣.
就算唔搭車,西瓜卡好似香港既八達通咁,周圍用黎俾錢買野都得,都好方便.
但留意唔會放太多錢入張卡,因為如果要退卡,退卡毋須手續費直接退回按金,但取回儲值金額就需要手續費.
所以,有餘錢,不如留番張卡,留待第時去日本再用,或者借俾其他人好過.
多謝舅父舅母sponsor兩張西瓜卡借俾我地,都慳番些少開卡費架,哈哈~
回想起當日第一次認真細閱日本地鐵路線圖,我真係O晒咀,因為啲線路仲亂過蜘蛛網,五顏六色,花到睇唔清.
不過,黎到日本搭得多之後,我其實已經唔再恐懼呢幅圖了,因為已經用過無數次,搭過無數次地鐵.包括以下路線:
都營地鐵: 淺草線,大江戶線
東京metro: 銀座線,丸之內線,日比谷線,東西線,副都心線
JR: 京葉線,中央線,Narita Express (NEX)
基本上,你搞得掂最常坐既丸之內線同大江戶線,東京自遊行對你已經唔係問題.
丸之內線響我印象黎講,係東京最繁忙既線路,深夜都勁多人搭,所以到埗或返港都唔好響上下午繁忙時間拖行李去搭,唔係盞GG.
大江戶線走向呈一個「6」字形,所以搭果陣要小心方向,尤其響交接位都廳前站.
有一個tips,就係highlight定你會去某啲地區既地鐵站,因為同一個地區可以有好多個車站,你是旦到達其中一個站,都可以上番地面步行去你想去既地方,就唔駛特登為左某一個站而轉線.
例如,距離極近既大手町,二重橋前,及東京大站.
又或者,銀座及銀座一丁目站,其實只係相隔幾條街,甚至只係隔離.
又例如你去東京鐵塔,都有三條路線既三個車站俾你出閘前往,所以真係幾方便.
不過,睇路線圖既轉線站要特別小心,因為尤其轉線站,有好幾條向住唔同方向既路線經過,路線圖個標示會好複雜,好容易被誤認為另一個站.
或者簡單啲咁講,因為太多站太多路線,路線圖根本唔夠空間容納咁多資料,所以有時你見到個車站名,都唔知佢refer to邊個位.
最有效既方法,就係plan行程時善用路線圖車站既數字標記,包括線路顏色,路線英文編號,車站編號.
例如新宿御苑前站係紅色M10,即係紅色M線第10個站.有埋數字對位,就包保唔會錯啦.
講晒啲technical既野,就講下日本人既地鐵文化.
其實好奇怪,對我黎講,日本人應該係好有禮貌好熱情,但一落到地鐵站,成個氣氛就唔同晒,啲人變到好cool,個個都唔出聲靜晒,而且好多戴上口罩.(好似話係因為花粉敏感症高峰期)
日本人響地底行路比較急促,唔會點理人.上到列車,就會用力逼入去,向裡面既乘客擠壓,話之你俾我推低.
其實真係好佩服佢地唔怕面貼面,屁股貼屁股咁搭車.日本地鐵車廂點解裝到咁多人,lol.
我地都算好彩,就算朝早上班時間搭車,擠擁既程度都尚可接受,似係搭港鐵.
唯一一次真係逼沙甸魚俾周圍既人夾實,就要數迪士尼樂園果晚折返,嘩,啲人點解可以大力成咁,我feel到企車廂中間既乘客俾繼續爭上車既人推到節節後退,壓埋落黎早上車既我地.
其實如果你目擊住個情況,你會覺得真係好誇張,連隔離有個日本阿叔都笑.
結果全程我係單丁腳,用腳前掌企,個身仲要打斜既.郁都唔駛郁,扶手都唔識捉(咦,押韻喎xd),因為就算列車急停,你都俾人夾實都唔會有事.
今次真係完全體驗了日本地鐵文化,試一次就夠了,哈哈.
待續
   

21/4/15 陰
東京之旅 #thesweetestcoupleintokyo Sue & Raymond Episode 14
後記 - 超市篇
日本既超市係好值得講,因為大部分響百貨公司地庫既超級市場,個setting都同香港唔同.
日本百貨超市係好似分封諸侯咁,分割開好多部分,每個細區域外判俾一間品牌營運.
情況就好似香港百貨公司既專櫃咁,但呢度係專屬既區域,size大概三四個booth咁上下.
所以,你走入超市幫襯,你買既野,好有可能係直接響counter度俾錢.
簡單啲講,個模式就係銅鑼灣崇光百貨超市既禮盒部.基本上,日本超市必備禮盒部,日本人好興買呢啲,唔知係for送禮定自用.
就算唔係禮盒部,好似生果咁,就咁係拎去cashier俾錢,你拎上手既生果,好大機會係屬於該區域掛單既品牌.
日本百貨超市並無我地平時響百佳惠康見到,一排排堆到勁高既貨架,所有野都係一個區域一個個booth咁樣,空間感好大.
我都覺得好奇怪,無貨架排列啲貨,要搵野咪好麻煩?...果然,當我地想搵支水,走左兩個圈,響一個個禮盒專櫃穿插,先響某角落見到些許貨架放左蒸餾水.
其實如果係咁既話,其他貨物例如餅乾即食麵等乾糧,我到底去邊度搵好?
百貨超市似係買新鮮即食既野多啲,一般既包裝產品,似乎呢度唔常見.
可能,百貨公司底層既,根本就唔係超市,而係食品部.因為睇番水牌都可以稍稍參透到玄機.
咁超市呢?真正既超市呢?響邊度?...我去左六日東京,似乎都唔見街上有超市.
唯獨,響東京站既地下街,見到一間叫「成城石井」既超市.呢間既setting就真係似超市嘞,有貨架有凍櫃有乾貨,但鋪面就細過香港既超市,反而似大昌.
我地估,可能超市響日本黎講比較low-end,所以唔係出現於百貨公司,而係地下街,甚至係較低檔次既地下街.
不過,講到響百貨公司買野,不得不提店員既服務態度.
日本人係出晒名有禮貌既,但我發覺係有禮貌到一個誇張既程度.
我地只係響其中一個專櫃買左好少好濕碎既野食,但個店員就好似開左張大單咁,四萬咁口咁微笑,一輪咀講一大輪多謝我地之類既說話.
而且佢係全程不斷向我地鞠躬.甚至當我地俾完錢,拎埋野轉彎走,佢竟然係轉身向住我地繼續鞠躬,其實我勁唔好意思,lol.
另外收銀員既服務態度又係親切到無得挑剔,基本上佢對住每個客人都會up一大輪野,其實真係替佢地感到辛苦.
不過似乎佢地已經做到麻木,有時講野其實都唔係望住個人,眼神有少少空洞,而且都有啲機械式.
呢種叫做emotional labor既現象,員工被指令用預設既approach去接待客人,好似戴左個面具咁,無左自我.響日本呢個咁講求禮貌和尊重既社會,十分常見.
所以,作為遊客,只能夠做既,就係有禮貌同友善地對待番佢地,同埋敬佩佢地呢種服務態度.
待續
   

20/4/15 陰霾
已經隔左成個月,完sem先有時間寫埋最後一日既行程,陰公豬...
希望快手快腳寫多幾集後記,圓滿完成呢個系列啦!~
東京之旅 #thesweetestcoupleintokyo Sue & Raymond Episode 13
Day6 --- 14 Mar (Sat) 新宿御苑、新宿
AM
10:20 Hotel check out
10:25 酒店旁吉野家Breakfast
10:50 西新宿站往新宿御苑前站1號出口[M10](車程5min)
11:00 新宿御苑賞櫻花 (開放時間:9:00到16:30。星期一公休)(入園料: 大人200円)
PM
12:15 新宿行街、途經思い出横丁、新宿郵便局寄Postcards
1:40 沼津港迥轉壽司Lunch
2:20 新宿京王百貨，再步行回酒店
3:15 到達酒店取行李
3:25 西新宿站直達東京站[M17](車程21min)
4:10 到達東京站巴士總站八重洲北口七號站頭，乘The Access Narita 1000yen巴士往機場
5:15 到達成田國際機場二號航廈南翼Check in，行禁區免稅店
6:45 機場禁區ASIAN CAFE Bowl Bowl 拉麵Dinner
NRT Terminal 2 South Check-in Counter S    HK Express - UO 629 19:50 departs
 
終於都黎到最後一日喇,其實都係得半日時間,所以只能夠近近地,行下新宿,買下手信咁.
響酒店大堂check out之後,走去隔離食吉野家,睇下日本既吉野家同香港既有無分別,哈哈.
其實呢幾日經過,都好想試架喇,不過最後發現個味道同香港一樣,完.
不過,就好似無煎雞飯,但就有鰻魚飯.
另外,日本既吉野家並非好似香港快餐店咁既卡位setting,而係一張U形既吧台,向吧台入面既店員落單.
價錢方面就好平既,細牛肉飯(份量同香港一樣),380yen,即係廿幾蚊.應該因為吉野家響日本只係低下檔食肆.
 
食飽就落樓下搭metro去新宿御苑,去睇櫻花花花花花!!~~~~
其實好開心,出發前夕睇到新宿御苑網頁消息話有櫻花開左,要多謝SueSue告知,提議去呢個地方.
新宿御苑正門有Information Centre,內有展覽介紹園內四季花草植物.
響旁邊既自動售票機買入園票後,就可以進場,入場費十零蚊,for遊客真係好平.
而且新宿御苑係東京其中一個比較大型既公園,雖然無上野公園咁多野睇,但都幾值得黎.
  
沿路行入園中央,係一個廣闊既大草地,但又唔係綠草好茵果種,真係有啲似三藩市金門公園.
今天天氣好靚好舒服呀,都幾想freestyle咁慢慢行下,奈何唔夠時間.
好快見到第一堆櫻花樹,有白色,有鮮粉紅.但因為初開,所以唔算茂盛同燦爛,我地都預左.
不過都有一棵淺粉紅既,真係開得幾密,仲有啲綠葉襯托住,幾靚下.
坐響樹下既長櫈影相,係絕佳既拍攝角度.
 
原本以為只係得呢度有櫻下,但離遠望見到入面仲有粉紅色,於是再向入行,果然!
嘩!!!~~~ 十個嘩! 呢度先係真正既櫻花樹!
唔好睇前面果棵好似好紅咁,我諗應該都係櫻花黎,只係顏色唔同.
不過,最吸引到遊人既,當然係隔離果棵淺粉紅啦~
又大棵,啲花又密,真係好美麗.雖然有唔少人圍住棵樹影相,但成個環境都好浪漫,好有氣氛.
黎到東京,親眼目睹櫻花盛放既一面,已經值回票價,願望達成!
當然,除左呢一棵,上野公園正門果棵都好靚架~係今個旅程既bonus.
 
原來新宿御苑都有日本茶園,而金門公園裡頭果個就係抄呢個風格!
真係幾有趣,我同Sue先後見到五重塔同日本亭園仿造及真實既一面.
但呢度個日本茶園大好多,淨係個湖都好大啦,金門公園果個就一眼望晒lu.
 
好爽快行完新宿御苑近新宿既主要部分,就離園前往新宿市中心,把握最後時間行百貨公司揀禮物買手信.
途經新宿JR站火車天橋底既思い出横丁,呢度係食宵夜既好地方,但我地無機會黎呢度食local美食,只能到此一遊.
咁啱又經過,郵政局,真係巧合得不得了,唔駛花時間搵郵筒了.(不過東京既郵筒其實都好密集下,好多地方寄到信)
 
最後,跟旅遊書推介,響地下街搵一間叫沼津港既迥轉壽司,我地真係好中意食壽司,哈哈.
呢間鋪位於一個比較up dup既地下街商場,個裝修有啲似大埔中心既翠屏商場,lol.
不過間鋪幾大,好多位,所以人流流動得幾快,就算要等位,都好快有位食.
仲要坐正響出壽司果個位,真係幸運到無人有,Yeah!~
好搞野,往往隔離既日本人唔多出聲,慢慢享受食壽司既滋味,一碟一碟咁食.
我地香港人就會滾水淥腳,對住啲野食影一輪相,跟住興高采烈講東講西,又狂攞好幾碟壽司放滿檯面,真係好誇張.
 
食完,輾轉返去京王百貨買埋野後,就趕番酒店拎行李,再拖住行李搭metro到東京.
去東京既原因,係因為直達機場既1000yen巴士,只係serve東京同銀座.所以,就要由新宿去左東京先.
經過第一日拖喼響新宿JR大站搵路既洗禮,我其實好擔心去到東京果陣會GG.
但無計啦,因為1000yen實在太平,平過火車近三分二,所以都要一試.
 
黎到東京metro站,可惜,又遇到星期二果日既問題,就係指示牌指示左一個錯誤既方向俾我.(我懷疑係我理解錯誤,或者途中miss左啲轉彎位行錯路)
但我就搵黎搵去都去唔到八重洲北口或南口,我懷疑係中間俾JR大站頂住左,阻住左我地去路.
結果搞一大輪,又去車站問人,先走出大站,行車站外圍,兜大個圈,先可以好似星期二咁,行番果日穿過既狹窄行人隧道,先可以由車站既西面去到東面.
我覺得呢度真係伏到PK,俾佢搞一搞,我地差啲上唔切book左機場巴士,剛好成為最後兩位乘客上車,陰公豬.
早知呢度伏到咁,我揀番車站規模細少少既銀座好過,況且The Access Narita銀座先係總站.
 
唉,有得上車都偷笑了,不過就流晒大汗,而且行左好多冤枉路有啲乏力.
同埋覺得好可惜,因為原先諗住可以落到去東京站一番街,買番盒好好味既芝士條,最後事與願違.
想講1000yen巴士有可能係去機場最快捷既交通工具,真係1個鐘到機場,而且響highway行駛仲快過做遊客生意既高價利木津巴士.
1000yen似係local會坐既多啲,但都有部分遊客乘搭.
 
去到機場,check in後入禁區,先發現呢度商場咁細咁少野行,連免稅店都得果幾間,原來一般商戶都集中響禁區以外既頂層.
OMG,早知係咁就唔入離境大堂住啦,響上面睇多陣野先無咁悶.
既然係咁,唯有慢慢睇幾間免稅店啦,執多幾盒零食做手信,先去間類似food court既餐廳,食埋響東京既最後一餐.味噌湯底既叉燒拉麵.
食完都差唔多行去機場最盡頭既登機位了.原來裡頭都仲有免稅店,但價錢同禁區商場都差唔多.
以為hkexpress真係會check得好嚴乘客既隨身行李,但原來都係求其無理到,早知就唔駛咁乖將啲野pack得咁實啦.
準時起飛,如時安全返抵香港國際機場,結束六日五夜既東京之旅.好不捨呀~
留意稍後既後記,會講番對日本既觀感及旅程後感.
待續 (如以下相簿幻燈片失效,請按幻燈片之相簿標題閱覽相簿)
 

1/4/15 陰霾
東京之旅 #thesweetestcoupleintokyo Sue & Raymond Episode 12
Day5 --- 13 Mar (Fri) 迪士尼樂園
AM
7:30 酒店旁Family Mart買飯糰和蒸餾水
7:40 西新宿站[M07]直達東京站[M17](車程22min)
8:30 東京站轉乘JR京葉線直達舞濱站(車程17min)，再步行往迪士尼樂園
9:10 迪士尼樂園 (Opening Hours 8:00-22:00)
PM
10:35 舞濱站JR 武藏野線到東京站，轉乘JR中央線快速直達新宿站(車程50min)
11:40 新宿一蘭拉麵Dinner
MIDNIGHT
12:20 新宿三丁目站紅色M線直達西新宿站[M07] (車程3min)
1:00-3:00 影戰利品、執行李
 
續上文.食完飯都只係下午中段時間,就要排最受歡迎既巨雷山.
望住個waiting time成兩個幾鐘既牌,無辦法都要排隊,sosad.
奇怪當地日本人唔介意花咁多時間走去排隊,佢地仲笑笑口,好似好enjoy排隊咁,我真係好佩服佢地,我呢啲香港人就無咁好耐性喇.
諗番起上年響美國洛杉磯環球影城,何嘗唔係要打蛇餅等?洛杉磯果邊仲熱過呢度好多倍添.
但呢度個問題係太多人,放得太多人入園,其實園內既遊樂設施根本負載唔到咁多人.
另外,唯獨Disney有fast pass制度,職員會放晒fast pass既人入去先放standby既人,真係dum左好耐時間.
其實,整一條single rider既隊,可能更加善用資源,分散到人流.可能日本人唔興「搭檯」,唔中意俾人騷擾啦.
所以,同樣要排隊,我會覺得環球影城玩得開心啲.
anyway,講番巨雷山,確實好有快感,同埋有啲位會置身黑暗之中,幾刺激,都覺得值回票價既.
 
由日頭等到夜晚,走出巨雷山天已入黑.又要過番去明日世界用番fast pass玩太空山.
呢個太空山真心恐怖過香港,因為時間較長,速度較快,極少抖氣位,架車就一味不斷轉,轉到頭都暈,哈哈.
同埋因為響室內漆黑一片,就要lock實自己條頸,驚衝力太大,頭部和身軀會被扯左出車外.
所以要視乎架車轉彎方向,個向心力係向內壓抑或向外扯.都唔係咁易玩架.
我會覺得,呢個真係超越左迪士尼一般既驚險水平.
         
響太空山外買個原味爆谷,就去睇小飛俠天空之旅.(原來迪士尼啲爆谷有唔同種類既特色口味,豆腐味豉油味都有,lol.)
排緊隊果陣,咁啱外面就做緊夜間遊行「東京迪士尼樂園電子大遊行～夢之光」,嘩,呢個好正呀,好多卡通人物,五光十色,呢個香港無,所以好特別.
加上我地錯過了日間parade,依家排住隊睇夜晚既parade,即刻覺得值回票價,哈哈.
近乎parade尾聲時先排到去小飛俠.又幾盞鬼喎,坐海盜船飛下飛下,盪下盪下咁,有少少似過山車,因為佢有幾下都轉得幾快下,好似真係飛緊咁.
 
跟住就係飛奔去日間多人但夜晚少人既小小世界,其實個format同香港一樣,不過就大啲.
無乜特別,都係睇啲細細隻卡通,聽下音樂咁,啱晒小朋友同女仔.
日本人睇呢啲show會靜心欣賞,唔似我地啲香港人咁,見到咩就影低,驚死蝕底咁,哈哈.
而且,雖然隻船係分一排排坐,但feel到全隻船得我地先郁黎郁去影相,又會講野.其他日本家庭係唔會出聲,坐低周圍觀賞就算,好有教養.
   
玩完小小世界差唔多到重頭戲煙花,先響toontown附近行陣,再到城堡,剛好煙花開始.
煙花比預期中短,好似同香港差唔多,不過響外國睇始終係唔同啲既,而且周圍都係日本人,個氣氛同環境都差好遠.
 
霸啱有利位置,當煙花一完結時,就即刻跑去怪獸電力公司「迷藏巡遊車」,呢個最多人玩既遊戲.
揀夜晚先玩,因為多數家庭睇完煙花就會離開,呢個時候就係玩呢啲熱門野既好機會.
不過,就算響呢啲時間,無fast pass都要等一個鐘,可想而知迪士尼係幾咁多人.
怪獸公司就係類似巴斯光年果啲,要同電筒去照啲目標,照到啲景物就會有特效,例如隻公仔會彈起,或者發出音效,幾有趣.
 
諗住玩埋怪獸公司都接近十點,應該七七八八,不過就唔係好想走咁,想用盡樂園既時間,於是又由明日世界趕去夢幻樂園.
一個我本身幾想同Sue玩既遊戲---咖啡杯.愛麗絲的午茶派對.嘻嘻.
轉呀轉!...相反方向!...轉呀轉!...相反再轉過!
哈哈,真係好爽.難得樂園員工好貼心,唔係提早或準時十點就截龍,你想玩既話都可以排隊,盡量滿足晒所有遊客.
 
哎呀,終於要走了.總結全日應該玩左十一樣野,再加睇晚間巡遊.
雖然日間玩得唔係幾開心,覺得好辛苦,但去到夜晚,一次過掃左好多games同shows,已經覺得幾唔錯,算係咁了.
同數以百計離園既人一齊逼JR返東京,再轉中央線快速,四個站就到新宿,但相比原先出發所乘搭既metro,節省既時間不多.
不過今次,我同Sue先真正體驗到日本人逼地鐵沙甸魚可以有幾恐怖,laugh out loud.稍後會更大家分享.
返到新宿,去到一蘭已經十一點半,已經唔係晚餐,而係宵夜.
不過一蘭實在太正太好味太抵食了,所以旅程尾段,一定要食多次!
不過新宿一蘭分店比較細,夜晚食拉麵既人又幾多下,所以要等位.
最後,返到酒店整頓行李,因為第二朝就要check out了,sosad.
飛之前,當然先影低我地響日本既戰利品啦,哈哈!
依家睇番,其實唔係買左好多野啫,係咪?
待續 (如以下相簿幻燈片失效,請按幻燈片之相簿標題閱覽相簿)
 

1/4/15 陰霾
東京之旅 #thesweetestcoupleintokyo Sue & Raymond Episode 11
Day5 --- 13 Mar (Fri) 迪士尼樂園
AM
7:30 酒店旁Family Mart買飯糰和蒸餾水
7:40 西新宿站[M07]直達東京站[M17](車程22min)
8:30 東京站轉乘JR京葉線直達舞濱站(車程17min)，再步行往迪士尼樂園
9:10 迪士尼樂園 (Opening Hours 8:00-22:00)
PM
10:35 舞濱站JR 武藏野線到東京站，轉乘JR中央線快速直達新宿站(車程50min)
11:40 新宿一蘭拉麵Dinner
MIDNIGHT
12:20 新宿三丁目站紅色M線直達西新宿站[M07] (車程3min)
1:00-3:00 影戰利品、執行李
續上文.今集會點列式敘述我同Sue響東京迪士尼樂園玩過既遊樂設施:
 
大賽車場,比香港果個大啲,轉得多啲彎,但就無好似香港咁有得上橋,格式比較似一個真實既賽車場.
其實幾好玩,之後路過自己會有少少衝動想玩多次.因為近明日世界,日間初段時間比較多人,但稍後就愈來愈少人.
 
星星火箭,在空中一邊繞圈轉彎一邊升降,本應係個幾輕鬆開朗既遊戲,不過座位空間實在太狹窄,其實根本坐唔到兩個人.
其實迪士尼有一樣野好失敗既,就係無安排一個櫃或者架俾遊客先行放低自己既個人物件,要攬住個袋去玩,其實真係好唔方便.
所以我都唔建議人帶太大既背包或袋去,以免自討麻煩,亦造成潛在風險.
 
因為拎左太空山及巴斯光年星際歷險的fast pass,所以先去玩埋隔離既星際旅行：冒險續航.
類似環球影城既室內機動列車,一邊觀賞熒幕既動畫故事,架車就會不斷震,chok下chok下,帶俾你一種好似玩過山車咁既離心力及快感.
不過迪士尼在刺激方面始終都係低一個水平,因為始終for小朋友,唔能夠太激烈.所以其實無乜離心力,反而係加速扯你向前果種感覺做得幾好.
 
巴斯光年星際歷險,同香港果個一模一樣,所以今次係我第二次玩,比上次有進步,雖然turn out都只係level 2,哈哈.
真係好難理解點解前面果個日本人可以射到十萬幾分,laugh out loud,係咪成日入黎練.
 
原先諗住排豪華馬克吐溫號,但我帶錯路,排錯左新落成既叢林巡航：勇闖野生世界.
嘩,等呢個就辛苦咯,雖然等左只係約兩個鐘唔係最耐,但見到出面咁大個蛇餅,條人龍又無乜點郁,果陣又係正午時間好猛太陽,係我地最失望最落莫既時刻.
等到天荒地老先上到艘船,但睇既熱帶叢林環境又唔係太像真,唔值得排咁奈.
不過個領航員導賞得幾落力,幾吸引既.只可惜我聽唔明佢講乜.
 
出到黎,剛剛錯過了午間巡遊,跑到去巡遊路線末段,只能夠睇到最後一架花車,sosad.不過都好,起碼都算睇左一幕集個郵,lol.
行一行Suesue最愛既小熊維尼紀念品店,就去食飯.
樂園裡頭既野食收費完全無overprice既情況,唔似得香港果啲會開天價擺明搶錢.
我地原先好想食雞髀及爆谷,但東京迪士尼實在太多人,多人到每架小食車既人龍有成幾十米長,即係有好幾十人等緊,痴孖筋!
你當就買隻雞髀花既時間好似排一個機動遊戲咁,多人到好恐怖.
所以,我地直接去左間快餐店,食個咖哩豬扒飯.店內有冷開水無限任添.
待續 (如以下相簿幻燈片失效,請按幻燈片之相簿標題閱覽相簿)
 

31/3/15 晴
因為返黎香港之後太忙,學業及學業以外的事都好多,所以睇番日記日子,都隔左十一日無寫遊記,所以記憶都開始模糊,未必講得咁仔細,望見諒.
東京之旅 #thesweetestcoupleintokyo Sue & Raymond Episode 10
Day5 --- 13 Mar (Fri) 迪士尼樂園
AM
7:30 酒店旁Family Mart買飯糰和蒸餾水
7:40 西新宿站[M07]直達東京站[M17](車程22min)
8:30 東京站轉乘JR京葉線直達舞濱站(車程17min)，再步行往迪士尼樂園
9:10 迪士尼樂園 (Opening Hours 8:00-22:00)
PM
10:35 舞濱站JR 武藏野線到東京站，轉乘JR中央線快速直達新宿站(車程50min)
11:40 新宿一蘭拉麵Dinner
MIDNIGHT
12:20 新宿三丁目站紅色M線直達西新宿站[M07] (車程3min)
1:00-3:00 影戰利品、執行李
 
由於住響新宿,響東京圈西面,要去東京圈東面以外既迪士尼樂園,就要預算更多時間坐車.
所以,一朝早就響酒店旁既24小時便利店Family Mart,買成袋飯糰及兩大支蒸餾水,for入場用.
我想講,間酒店個location真係超好,樓下就有快餐店便利店地鐵站,撇除唔近新宿市中心既百貨公司(但其實如果要近,個價錢就無可能咁平).
不過預夠時間,都係要GG,因為實在估唔到坐地鐵響東京大站出閘,要行咁遠先到JR站京葉線,大站個範圍真係好大.
如果你睇番上面既時間表,扣番十分鐘食飯糰時間,我地應該起碼都行左15分鐘先去到轉車,好誇張.
JR列車車廂原來同一般地鐵車廂一樣,不過座椅好似靚啲舒服啲,但其實可能純粹因為呢班係新車.
東京迪士尼樂園好似已經離開左東京都,沿途可以睇到海濱風光,同埋日本比較空曠既環境,響東京好難見到.
經過見到葛西臨海公園既摩天輪,可惜列車太快影唔到相.不過真心想去呢度行下,好似幾outdoor幾爽咁.
旅遊書無介紹葛西臨海公園,呢度似係local會去既地方多啲,反而應該有唔少本土風情見到,我估.
 
去到舞濱站,已經係九點,係入園高峰期,所以趕快穿越人群,步行往東京迪士尼樂園正門.
我地其實諗左好奈,到底去迪士尼樂園還是迪士尼海洋.迪士尼海洋多show睇,但就無迪士尼樂園咁浪漫同夢幻.
不過,我地都同一心態,就係第一次去東京,應該玩番original既迪士尼樂園,所以就揀呢個啦.
我地係預早上網買e-ticket的,價錢比香港旅行社買更加平,不過如果真係想要一張正版門票留念,可以去東京既Disney Store既,詳看前文.
 
東京迪士尼樂園,其實個格式或園區分佈,同香港大同少異.
又係一入到去美國小鎮大街,中間係城堡,左邊係叢林或冒險世界,右邊係明日世界,向前行到盡係幻想世界.
雖然我唯一一次去過香港迪士尼公園係2008年5月,但我都幾深刻印象.
所以,我覺得,東京迪士尼,其實唔係話好大,純粹因為每個遊樂設施之間相隔得遠,條路又闊,所以transit去另一個位要行多左路啫.
 
另外,黎迪士尼,如果要玩盡所有野,真係要八點鐘開門就衝入黎拎熱門遊戲既fast pass.
經過我地今日既經驗得出,巨雷山及怪獸電力公司「迷藏巡遊車」係頭兩位,兵家必爭之地.
另外,飛濺山,太空山及小熊維尼獵蜜記,都值得拎fast pass.就要視乎喜好及實際情況而定.
但其實最多都係拎到三張fast pass,因為fast pass會於中午期間派晒.假設八點幾拎,跟住十點幾,再去到十二點幾就拎到三張.
而我地九點幾先攞,所以就趕唔切攞第三張.再因為攞左啲無咁多人爭既fast pass,例如巴斯光年星際歷險,所以蝕左唔少,巨雷山要排勁奈,飛濺山都玩唔到.
原來,遊客黎得Disney,一定要做定research plan定攻略,我地無做定就喊都無謂.
所以,日間花了不少時間排隊乾等,其實唔係幾開心,心諗為乜要企兩個幾鐘響度乾等,好痛苦,仲要排到急尿但已進入設施內部去唔到廁所.不如響新宿行多日街算,真心.
同埋,都同自己講定,返到黎香港,唔會推介人黎東京迪士尼玩,因為真係好無謂,唔係咁值得.
原先,我地諗住早少少,睇埋煙花就走,但turn out,我地都係玩到十點幾樂園關門,先發現原來晚間先係掃勻遊樂設施既時機.
煙花過後,人群開始離開,園內人流少了一截.只要把握到,趁煙花完結一刻即刻狗衝去熱門設施,係可以快過一啲行得慢既人,搶先玩到下個遊戲.
其實有樣野好唔明白,明明係平日,點解迪士尼會有咁多學生,仲要著住校服.佢地唔駛返學架咩?...唔通係學校旅行?
如果學校旅行黎呢度就爽喇大佬.不過我地真係好唔明白,樂園其實近九成係本地人,都無乜見到外地遊客.點解既?
真心一問,點解啲日本人咁中意玩迪士尼既? lol
今集係我對Disneyland既整體觀感,下集會列點式介紹番我地玩過既機動遊戲俾大家聽!
待續 (如以下相簿幻燈片失效,請按幻燈片之相簿標題閱覽相簿)
 

20/3/15 晴
東京之旅 #thesweetestcoupleintokyo Sue & Raymond Episode 9
Day4 --- 12 Mar (Thu) 淺草－＞上野－＞東京都廳－＞新宿－＞池袋
PM
3:15 返回酒店小休放低行裝
3:35 西新宿站往新宿三丁目[M09](車程3min)
3:45 新宿OIOI丸井百貨買鞋
5:30 新宿行街及附近百貨、於超市買壽司做Tea
7:00 新宿三丁目站啡色F線直達池袋站[F09](車程9min)
7:10 池袋行街及附近百貨
8:45 排隊食池袋三越百貨八樓美登利活壽司Dinner
10:00 夜遊池袋東部
●    池袋世嘉大樓(SEGA)
●    Round 1 Entertainment
●    Bic Camera
10:40 池袋站啡色F線到新宿三丁目[F13]，轉紅色M線直達西新宿站[M07](車程15min)
 
續上文.響酒店放低野後,再出發去新宿行百貨公司.
OIOI係suesue最中意既百貨公司,啲野好啱佢睇,價錢又合理,所以佢可以慢慢行.
而我就趁呢段時間,走上商場天台既英式庭園,拎出一大疊postcards出黎寫.
天台設施多數都係本地人使用,所以啲人見我呢個外國遊客走上黎坐,仲響度寫postcards,都有望過我兩眼,覺得有啲奇怪,哈哈.
行完OIOI,之後再響附近街道及百貨閒逛,天黑先搭車去池袋.
 
雖然池袋響旅遊書係佔一大部分,但我地覺得池袋好似唔係咁適合我地,無好多特別野要睇或去,所以預比較少時間.
不過七點先去確實係唔夠時間,原定去Sunshine City商場及Tokyo Hands,但因為無時間而cut左.
Tokyo Hands響新宿參觀過,並不如期望之中,所以今次去唔到池袋店,都唔會覺得太可惜.
而Sunshine City,因為東京既商場好多都幾高檔,我地唔會點行,所以就算cut左,都應該唔會miss左好多野,除非Sunshine City有啲咩特別野.
 
好概括地兜下池袋站附近商場,就沿地下街搵我地想食既梅丘壽司美登利.
去到搵到間鋪,但比我地想像中好唔同,因為間鋪又細又逼,堂食得幾個位,似係專做外賣但增設堂食位多啲.
你就當係地鐵站既爭鮮外賣店,但無端端加幾個位做堂食,坐響吧台有師傅整壽司你食.
我同Sue坐響度等位,越諗越唔對路,好似唔係我地想食既美登利.明明個店名一樣,但就同網上遊記講果間差好遠.
於是問下店員,但言語溝通唔到,佢遞卡片俾我,上面列明餐廳地址,又真係無網上遊記果間美登利.
此刻,唯一兩個可能性,一:想食既果間鋪執左;二:果間鋪唔屬於呢個集團,係另一間黎.
於是,我地搏一搏,去搵番遊記講既果間美登利,希望無執到.
     
響大站搵路去到三越百貨,再上到去八樓餐廳樓層.好好啊!!!原來真係無執到,呢間係另一間黎!
最容易分辨方法,係呢間個招牌有大大隻「活」字,所以個名係美登利活壽司,而唔係美登利壽司.但我都唔知係另一條line,定另一間公司黎.
所以大家都唔好去錯地方呀,美登利活壽司網址係: http://katumidori.co.jp/ (而我地去錯既地下街美登利壽司係: http://www.sushinomidori.co.jp/tachigui.html )
活壽司響東京好似得澀谷及池袋兩間分店,呢間都好似澀谷果間咁,要坐響出面等位架喇,逐個逐個移動,不過流動得都快,所以隔一陣就入到去食野.
呢間最有gimmick既係佢用ipad黎點菜,就好似本catalog咁揀,好cyber,亦都幾user-friendly,可以知道自己叫左啲咩,有埋時間寫明.
另外,更cyber既係,迥轉壽司帶之上,有條列車軌道for師傅將新鮮整好既壽司,放響架車仔度,架車就會順住路軌,準確地去到食客面前.
條列車軌道係單軌,所以,當壽司黎到果陣,會有閃燈及聲響提示,叫客人拎食物,另一面客人則無需理會.
咁樣order食物要等一段時間先有壽司送黎,同埋每次只會有四碟壽司送到.
因為已經好夜,其實都幾肚餓,所以狂叫野食,好彩日本既迥轉壽司唔貴,價錢相等於香港水平,甚至再平啲,所以又係當放題咁食,叫左成檯野食,哈哈.
仲叫了個蟹湯試試,大大碗,有肉吮下,都幾好味架,應該話好有鮮味至真!
 
食完活壽司,就係夜遊池袋既行程.可能係夜晚黎,更加覺得呢度MK.
原宿竹下通係MK妹果種MK,而呢度係真係旺中果種MK,即係唱K打機夜葡既地區.
同埋因為呢度零舍多學生聚集去玩,所以呢度係我成個東京之旅覺得最young既地方.
原先想去SEGA世嘉大樓睇野,不過因為響原宿影左貼紙相,而裡頭亦係夾公仔機果啲,都大概估到係咩黎,所以都無入去.
反而,我對隔離既Round 1 Entertainment幾有興趣.因為成棟大廈都係娛樂設施,並分門別類.
地下係夾公仔機之類既中學雞野,上幾層都係遊戲機,再上應該係保齡球場,頂層則是桌球室.
雖然唔係真係玩,但就咁行下睇下,都覺得好得意,因為香港唔會有呢類一站式既娛樂場所俾人玩.
不過行到上四樓,開始聞到輕輕一陣機鋪必有既焗臭味(已經無香港果啲咁臭),所以都係走番出去.
再路經埋池袋大站附近既Bic Camera,影呢間既外牆,係一隻手拎住部電話既模樣,幾有趣.
可惜當時太夜,間鋪已關門,否則開埋燈既話,呢個外牆設計會更加璀璨.
要留意,Bic Camera有好多分店,even同一區都係,唯獨近池袋站東口北果間先有呢個獨特既外牆,唔好去錯分店.
於Bic Camera到此一遊後,已經係晚上十點半,要早啲返去休息,因為之後一日,係去迪士尼樂園!
待續 (如以下相簿幻燈片失效,請按幻燈片之相簿標題閱覽相簿)
 

20/3/15 晴
東京之旅 #thesweetestcoupleintokyo Sue & Raymond Episode 8
Day4 --- 12 Mar (Thu) 淺草－＞上野－＞東京都廳－＞新宿－＞池袋
AM
11:55 淺草站橙色銀座線到上野站[G16](車程5min)
PM
12:10 上野恩賜公園賞櫻花及湖景
1:00 上野阿美橫丁及附近 (ABC-MART買鞋)
1:55 上野御徒町站大江戶E線直達都廳前站(車程20min)
2:20 東京都廳北塔觀景台
3:00 I-Land Tower LOVE像
3:15 返回酒店小休放低行裝
 
續上文.大約十二點於上野出閘,都唔得閒望附近新建既商場了,因為本身唔諗住行上野公園,或者只係響門口影張相就走.
但一場黎到,好擔心入到去會掛住影相唔捨得出黎,所以要預留最充裕既時間.(我連呢點都考慮埋,我覺得自己真係好謹慎哈哈哈)
果然,拾級而上,大門口就俾suesue見到櫻花,我都無留意到,佢一講我即刻好surprise!即刻狗衝過去睇.
因為我地一直預期係響最後一日行新宿御苑先睇到櫻花,無諗到響上野公園率先睇到,而且仲係咁靚咁燦爛!
能夠近距離欣賞櫻花,實在令人太興奮!~ 雖然我夢想係見到一整片盛開的櫻花,依家唔啱時間,但俾我見到一兩棵咁靚咁盛放既櫻花樹,已經好感恩了.
沿路行入公園,兩邊都有初開的櫻花,不過當然無大門口果棵咁靚啦.
 
咁啱公園路口有雜技藝人表演，響度睇左陣.行落樓梯,過對面馬路係一個大湖.
沿路風光怡人,天色晴朗,令人好舒暢,有少少響美國遊走既輕鬆感覺,不過都係無美國果種腳步輕飄飄既感覺,哈哈.
呢度似係民居外圍既公園,因為側邊係一座座住宅,下面係啲小公園for小朋友及長者休憩,見到有啲老人家纜住號碼布打木球,真係幾有趣.
其實行左接近一個鐘,我地都只係行左上野公園既前頭部分,再深入裡面,仲有動物園及藝術館等大型設施,淨係呢個公園本身都可以行一日.
不過我地有呢一個鐘頭bonus睇到櫻花和湖景,已經心滿意足了,爽快地離開公園,閒逛阿美橫丁.
 
阿美橫丁聽講真係for America,有啲鋪頭係美軍後裔開既.
但其實呢度似係街市或露天市集多啲,賣海鮮,糖果,餅乾,水果等等,就好似大埔既富善街咁.
估唔到呢度既兩間ABC-MART鞋店相距咁近,我響一間睇唔啱,行去另一間,就被店舖推介既特價timberland吸引到.
似模似樣既timberland casual款,只售10800yen,即係大約港幣七百零蚊,平到爛,香港邊可能買到.
http://www.abc-mart.net/shop/g/g5301120001023/
本來一直target緊其他款,一見到呢個咁平,諗都唔諗就即刻扑搥買喇,哈哈.執到筍野好開心.
之後再響附近既貨攤買了黑豆和紅豆,有啲重,但咁樣帶番香港都幾得意.
 
行完上野,下一站就係返新宿,繼續我地既百貨公司行程,因為我地始終放得唔夠多時間響新宿.
不過搭車返酒店放低戰利品既話要響都廳前站落車,所以索性順便上埋東京都廳既展望台觀光.
我地揀左北塔,但其實同南塔無乜分別.而前日響東京鐵塔睇夜景,依家睇日景,就非常配合了.
東京都廳都算係個旅遊點,所以地下大堂有訪客中心,不單止for觀景台,仲係for整個東京,提供旅遊建議及諮詢.
其實真係幾好呀,有個華人staff話可以用國語導賞我地參觀東京都廳,需時約半個鐘.不過我地要chur行程,影下相就走,所以婉拒了.
經安檢後搭升降機上到去45樓高202米,果然係好靚,視野好遼闊,有啲似香港既天際100,不過香港既當然高過呢度啦.
如果係朝早時間,或者下午較晚時間,或者睇得到遙遠既富士山,但依家下午時間能見度低番,就見唔到富士山lu.
另外,因為呢度實在太熱,外面射入黎既陽光猛烈,所以都係快快趣,蓋個紀念印章就離開.
     
我覺得啲行程真係調動得剛剛好,東京都廳行番西新宿站既酒店,途中經過I-Land Tower,可以順便到訪埋呢度出晒名既LOVE像.
好襯我地呀,都係咁有love,哈哈!~
留意其中一張相片,相中十字路口既交通燈係一個大圈咁安裝架,設計好獨特,都有少少cyber,其他地方見唔到.
註: 原來雲海兩日後都去過上野公園,仲去睇上野大佛,我都幾有興趣想知上野大佛係咩黎,haha.詳看以下片段.
格羅茲尼 第十八公里:「東京之旅」(共五節)
待續 (如以下相簿幻燈片失效,請按幻燈片之相簿標題閱覽相簿)
 
 

19/3/15 炎熱
東京之旅 #thesweetestcoupleintokyo Sue & Raymond Episode 7
Day4 --- 12 Mar (Thu) 淺草－＞上野－＞東京都廳－＞新宿－＞池袋
AM
8:30 西新宿站往赤板見附[M13]轉橙色銀座線直達淺草站[G19](車程42min)
9:25 海徬沿路同對面岸skytree遙距影相
9:40 雷門、仲見世通沿途食小食做Breakfast、淺草寺
11:00 大黑家炸蝦飯Lunch (11:00開門)
11:35 新仲見世商店街
11:55 淺草站橙色銀座線到上野站[G16](車程5min)
   
已經去到第四日,雖然今日多左池袋行程,應該預多啲時間,但結果都係八點半先出發.
turn out覺得都ok既,因為我plan得實在太好,無論交通同遊覽,每個位都預鬆晒時間,所以個plan整體係chur,但有好多空間調節.
加上我同suesue都唔係啲見到特別既野會停晒響度唔行果啲,我地睇野都幾efficient,就好似上年響美國邂逅果陣一齊遊覽加州科學院自然歷史博物館咁,好夾咁好快就睇晒啲野,好合拍嘻嘻.
 
響淺草出站,首先係行兩步路去海傍,跟skytree晴空塔影相.因為好多人話skytree唔值得專登上去,所以響對面岸遙距影相,就係最佳方式.
原來搭去台場既觀光船碼頭就響正呢度,雖然我無打算去台場...不過時間唔啱,淨係見到等船既乘客,卻見唔到隻透明觀光船,有啲可惜.
經過新仲見世商店街街口,穿過一批兜客既人力車司機,好快就行到去雷門.
其實東京咁多個地區,我諗淺草應該最反映到日本傳統特色和文化氣氛,非常吸引.
仲見世通兩邊既商店,一係賣紀念品精品,一係賣日本小食,例如丸子串,人形燒,米餅等等.
其實好想樣樣都試,但食得太多已經好滯,都食唔落更多.
啲店員好遵守日本禮儀文化,會禮貌地叫顧客走入店內或店旁進食,食完先好繼續行,因為日本人唔會邊行邊食.
行到尾係淺草寺,旁邊係五重塔,呢座塔,個款就等於響三藩市既Japan Town.當日我同suesue一齊行Japantown影假既五重塔,今次黎到真既影相,個感覺好得意,好奇妙,亦好難得!
淺草寺都有得敬拜既,但因為前一日拜過明治神宮,就無拜了,繼續行去睇下其他廟宇和庭園就算了.
睇番資料,淺草寺係當地人祈禱免於洪水及火災等自然災害的信仰中心,而五重塔最上層的空間收納了釋迦牟尼佛的遺骨(舍利子).
 
等到十一點,就係食歷史悠久既大黑家炸蝦飯.
旅遊書,以及我舅父,都推介去食,話係必食.但上網搵到,就有啲當地人話其實好難食,仲要咁多年黎都係咁難食,lol.
但我見到舅父既相,隻炸蝦老蓮咁大隻,仲有四隻咁多,遮蓋晒啲飯,真係極之想食.我同suesue講,就算難食都要食架喇!哈哈.
望個樣,我預期係過鹹同埋好熱氣,因為啲蝦炸到好黑,我諗應該落左好多醬油,好驚好鹹.
而turn out真係好鹹,sosad.雖然佢碗飯好大碗,但落既豉油實在太多,中和唔到隻蝦既濃味.
不過,飛起炸蝦表面多餘既炸粉,就咁食隻蝦,其實好好味,幾新鮮的.
港紙成百幾蚊碗既飯,比預期食得更加飽.另外,呢度既綠茶真係好好飲(並非因為食得太鹹要中和),飲多兩杯先捨得走.
可惜店員assign了卡位俾我地坐,雖然坐得舒服,但我地更有興趣坐另一邊既他他米,感受下日本風情.
最後,快快趣行埋新仲見世商店街,睇下周圍既特色野,就去番metro站前往上野了.
待續 (如以下相簿幻燈片失效,請按幻燈片之相簿標題閱覽相簿)