3/10/19 晴
鹿兒島之旅 2019 Sue & Raymond 28 Sep - 1 Oct 2019
#thesweetestcoupleinkagoshima
#2 豚とろ本店/天文館/山形屋/揚立屋炸魚餅/薩摩蒸汽屋
Day1 - 28 Sep (Sat)
我地今次揀左套票選擇當中最平既鹿兒島廣場飯店天文館,位置處於天文館通巴士大站南面內街,大約步行幾分鐘.
酒店房真實比想像中大,起碼可以開喼平放,張床又夠長,雖然無乜景但都算係咁架喇.
呢一帶有無數咁多間食肆,話說我出發前睇google map plan行程果陣時望到都嚇親.
另外,無估計到呢度去到夜晚就會變成紅燈區,酒吧唔算多,但多居酒屋,以至夜總會,色情場所之類,甚似東京既歌舞妓町.
Anyway,住呢頭有咁多選擇,真係是旦揀一間local既入去食都得,而且多數店鋪門外都有餐牌show埋價錢,唔駛擔心入去會中伏.
我地行過隔離街口,先食本身plan左既鹿兒島拉麵 豚とろ 本店.呢間有他他米座位,當然要坐下,感受一下日本既風情.
SueSue恨左好耐,終於可以一嚐九州拉麵,呢間拉麵就用粗身少少既麵,肉既份量尚可但較薄,味道略鹹,同埋面頭鋪左好多乾蒜,重口味啲但都好食既.
快快趣食完,我地穿過天文館通,趕往山形屋,就係Sue血拼掃貨既時間.
Sue本身已經諗定去FANCL,shu uemura,既要幫friend買護膚品,亦要為自己入貨.
個店員見我地來回買幾次野都覺得好笑,haha.
鹿兒島市既商店唔知點解好早關門,山形屋同天文館通呢邊,七點半至八點就關門,仲要係sharp cut果隻.
其實鹿兒島市啲餐廳都開到好夜,但商店就咁早收,早得令人驚訝.
好在有啲賣野食既鋪頭仲收拾緊,見到我地響門口徘徊打量,都主動開門邀請我地入去,日本人真係好nice.
我地響山形屋出面幫襯左呢間炸魚餅揚立屋本店,薩摩炸魚餅其實即係炸魚蛋,但佢地配以唔同餡料,有唔同食法.
味道其實一般,同響香港食炸魚蛋無分別,店員介紹我地試加左蕃薯既炸魚餅,口感都幾得意,既腍身又爽口.
只係買得兩塊魚餅,店員竟然送包濕紙巾同額外送多兩塊唔知咩餅俾我地,我地真係勁唔好意思,對日本人既服務態度留下好好既印象.
另一邊廂,我地去到和果子薩摩蒸汽屋,呢間野響鹿兒島好出名,亦有好多分店.
主要試佢地個吉士饅頭,個吉士餡都幾正,配埋件蛋糕都幾唔錯,唔算好甜,幾特別.
話說我地係買左第二晚先食,但品質都ok.
