5/2/14 清涼
拾遺童年回憶 vol.9 超人特工隊超級幻變章
超人特工隊都算係比較新的pixar動畫電影,2005年於香港上畫,農曆新年檔期.
果期好似都幾hit下,起碼我有捉父母入場睇,啲笑位都幾好笑,唔知點解,我好記得E夫人的金句:"齋講唔做,時光隧道".
強加上去的對白,但又押韻得深深印在我腦海裡,竟然記到咁多年,黐孖筋.
至於圖中呢一堆徽章係點得來?...話說當時屋企樓下仲係吉之島,唔係一田.
電影上映期間,推出呢個幻變章收集活動,於吉之島買夠五十蚊,就送一個幻變章.
所謂幻變章,即係扭一扭張卡,就會見到另一個圖案,幾有趣的.
其實要儲齊一套唔難,因為當時不時會到超市買野,吉之島超市係比惠康便宜的,而且夠近夠就腳.
不過,上天永遠不會讓你好過,偏偏最後我差一隻幻變章,真係喊出黎.
於是返學校,不斷R人,問人有無幻變章剩,可否施捨一個黎.
我只係抱住最後希望的心態去問,其實都無預計過有人會俾我,點知真係有位小學同學拍拍我膊頭,將一個幻變章遞給我.
我真係多謝佢都黎唔切,其實我同佢唔好熟,但午膳時間有時都會一齊坐傾下計咁,大家都唔係成績出眾果批.
不過,現在回想,我實在有負於佢,佢咁好心特登攞個幻變章俾我,我除了一聲多謝,起碼應該請佢飲野.
以前的我,實在太不懂得為人設想,太過自我中心(雖然現在如是),sosad.
之所以點解我咁中意吉之島,憎恨一田,因為吉之島俾我見到人性化的一面.
起碼吉之島會搞類似呢種儲幻變章的活動,逗下小朋友開心,一田有咩可能會搞呢啲.
另外,吉之島會聆聽民意,於活動中後期,設立櫃檯,處理顧客幻變章換款,讓顧客更快儲齊一套,唔駛盲目消費.
呢件事令我對吉之島的分數大大提高,更加唔捨得佢被逼結業.
Anyway,呢盒收藏,記載了我與吉之島的故事,甚至引證著與一位再無相見的舊同學的友情,加上人生難得的儲齊一套精品,我應該唔會棄掉的.
