1/1/20 陰
行行下超過103萬人參與的元旦大遊行,中途啲狗響灣仔搞事,結果遊行要被逼腰斬.
早左散水諗下食乜好,去左朗豪坊呢間平時keep住排長龍,今日就唔駛等位既天吉屋.終於搵到機會趁少人果陣黎試.
入到黎發現呢間野座位唔多,難怪要等咁耐.食物款式方面選擇有限,得幾款天丼,無得改配或加配,加飯亦可能需要落單時出聲,感覺唔係幾flexible.
價錢黎講就中等或中等以上,唔算貴得太離譜,因為望落啲碗好大,飯餸裝得好高,尤其香港限定的軟殼蟹丼真係好大份.
當然都估到個飯碗空間實際唔大,飯量無預期咁多,但單憑餸菜款式及份量,性價比勉強算係OK.
先試飲佢好香濃既茶,以為係玄米茶,原來係牛蒡茶.
天幕御膳係餐廳所推薦,應該係最大份最多野食,而且最嘆既一款.因為呢set可以任意加飯及沙律菜,而且有幾款食法.
看圖識字,可以當普通天婦羅咁食又得,食丼飯又一種食法,最尾仲可以叫店員拎鰹魚湯淋落飯度,再配芥末,稱為天茶丼飯.
雖然天幕御膳好似有齊晒所有配料,但其實款款天丼既配料都各有不同,例如想食魷魚就要叫番天吉丼.
呢度既天婦羅蝦係雙連既,唔知係開邊咁炸抑或係刻意兩隻拼埋咁炸,但因為多肉,食落口感爆登,而且炸粉唔多,唔會油膩.
軟殼蟹有少少蟹肉鮮味,唔會淡貿貿齋靠調味,質素唔錯既.
海紅鯛魚肉幾滑,同埋好大條,好少可咁樣食天婦羅魚肉,幾有趣.
溫泉蛋就正常,好難做得特別出色,響炎天丼都食到類似水準.
炸紫菜超級脆口,幾有驚喜.
總括黎講,連加一,埋單每人約百五蚊,食個天婦羅丼飯,話貴唔貴話平唔平,都係食商場地段及過江龍名氣.
味道正常,旨在食佢既食材及配料,相比出面既天丼呢間特別多餸菜款式,岩晒貪心既為食客人.
我地食慣炎天丼,都係中意佢既炸雞天丼多啲,haha.都係個人口味問題,所以今次呢間天吉屋可能我地食一次就算.
