無盡旅途 Endless Journey

12/10/19 晴

鹿兒島之旅 2019 Sue & Raymond 28 Sep - 1 Oct 2019
#thesweetestcoupleinkagoshima

#11 櫻島溶岩海濱公園/湯之平展望所/博多喜喜/機場超細間免稅店終極掃貨

Day4 - 1 Oct (Tue)

好快參觀完櫻島遊客中心,出番黎過對面馬路,往海邊就係櫻島溶岩海濱公園.
呢度同時又叫霧島錦江灣國立公園,所以我地都好confused,到底呢度同霧島果邊有無關係,係咪算同一個公園.
呢邊最特別係有條好長既足浴小徑,免費供遊人浸腳.我發覺鹿兒島呢邊真係好鼓勵人浸腳,haha.
始終係公家而且露天設施,都唔好預期有咩質素,純粹係有啲清水(微暖)俾你浸下過下癮,更加唔會有前日住溫泉旅館果啲硫磺泉水.
經過瞭望台,呢度有條好長既海邊小徑,溶岩なぎさ遊歩道.
呢邊可以睇到櫻島火山以前噴發後殘餘火山岩漿演變成今日既岩石沙泥,非常特別.
Sue想響度逗留多陣,可惜我地要趕巴士,所以要匆匆離開了.

以前觀光巴士會響三個景點短暫停留幾分鐘,但依家已經取消烏島展望所,以及赤水展望廣場既停留.
赤水展望廣場有個吶喊的肖像,係一個好浮誇既雕像,紀念日本歌手長淵剛2004年於櫻島開了場通宵演唱會,有成7.5萬人參加.
巴士左轉右轉上山,黎到成個櫻島的重點,湯之平展望所.響呢個站巴士會停留大約15分鐘.
通常啲遊客一落車就會衝去湯之平展望所個石碑影相,如果多人的話要排隊都等幾耐,好在我地今日無乜人.
我地就讓佢地影左先,先響巴士站前面影,呢個角度影左座火山好似更加宏偉.
展望所下層有紀念品店亦有間cafe,俾人坐響窗邊,一路嘆住杯野飲,一路觀賞櫻島.
上層就係好簡單的觀景台,於高少少位置睇火山.
我地好快響出面採集了少許火山灰,就趕上巴士離開,返回櫻島港.
距離下班船仲有啲時間,我地逛埋超商LAWSON,買盒炸雞食下,估唔到日本便利店啲炸雞係咁好食,滑嫩多汁.有人話FamilyMart仲好食,將來要試下.
沿路行返去碼頭,寄埋postcard,再響月讀神社門口前影個相打個卡當去左,就去坐櫻島渡輪返鹿兒島市了.

轉程電車,我地又返番黎天文館,最後一餐我地決定揀可以食得快既拉麵.
博多喜喜響鹿兒島有兩間分店,咁岩我地又食正本店.
我同Sue都叫左碗多肉既拉麵,加蛋,再要份餃子.
呢個拉麵既味道係同一蘭近似,叉燒肉量好多,比較肥,整體都好好食.
Sue叫左碗「白」,我就叫碗「黑」但少辣,食落兩個湯底味道近乎一樣.

以拉麵黎為成個鹿兒島短trip收結,係一件好幸福的事.
我地返酒店拎番行李,就去坐機場巴士到機場了.今日全國正式加稅,連機場巴士都貴左50yen,haha.
鹿兒島機場國際線航廈雖然新淨但都仲係幾簡陋下,一通過出境關口就已經係好簡單的候機大堂,望落似係港澳碼頭等船多啲.
呢度得一間賣食物既免稅店,一眾旅客都係逼黎呢間鋪選購貨品.
我地見呢度賣既野都唔貴,有部分仲比香港平,所以都掃左少少貨,剛好用盡手上的現金.財散人安樂!
香港航空返香港程機固然都係A320無個人娛樂設備兼用零食代替飛機餐,真教人不爽.
話說我地本身都想返香港之後寫email去投訴疑似贊助零食呢個問題,有位空姐可能見我坐響度好得閒無野做,遞左張意見調查表俾我填.
嘩,我真係多謝晒你喎,本身都仲諗緊寫唔寫去俾HKA好,你既然邀請得埋我,咁我都不得不抒發下我個人意見啦,係咪?