無盡旅途 Endless Journey

26/3/22 陰

好耐之前已出晒名,位於紅磡廣場地庫既寶城美食店,專門炮製生炸雞脾.
因為間茶餐廳星期日休息,所以以往都較少機會專登渣車過黎試.
估唔到三點鐘後去到間鋪都係爆滿要等位,之後來到既食客直頭要坐響餐廳出面.
呢度原來係快餐店式運作,要響門口收銀處買飛,再交飛去水吧,拎個號碼牌坐,之後會有店員送餐.
佢地話炸雞脾要等二十至三十分鐘,真係嚇親,大佬我真係好肚餓啊,好在最後只係等左十至十五分鐘就有得食!
炸雞脾茶餐同午餐跟飯既價錢差唔多,所以通常建議食雞脾飯,我地叫蘑菇汁就加三蚊,個base就似係黑椒汁多啲.
超大隻雞脾新鮮即炸,外皮脆薄,一咬就裂,但又唔會充滿雞皮果種油脂,造到完全香口.
雞肉未至於爆汁但都夠juicy,肉質算嫩滑,整體都算好味,主要都係覺得過癮,夠正.
因為太肚餓關係,飲埋杯凍奶茶都覺得唔夠,再整多塊奶醬多先罷休.
今次應該係第一次行紅磡廣場,估唔到星期六黎講都幾旺幾熱鬧,原本以為呢度又舊,又已經係死場好冷情,但行落都覺得還好,唔恐怖喎.