11/11/22 晴
咁岩星期五請左半日假,找住最後的尾巴,把握西九龍文化區M+博物館最後一日免費入場.
M+開幕左成年,未開幕前已經覺得座建築幾靚,係西九公園既一個打卡位.
上年佢地開放參觀,香港疫情下無新地方好去,結果人群一浪接一浪地撲去M+.
本身我同Sue對藝術呢方面又識條鐵,所以一直無plan會去.
但最近得悉原來將來入場要成$120,睇草間彌生更要total $240,都係趁免費入場抵玩啲.
M+逢星期五會開放埋晚間,可能係for市民一個慶祝happy Friday既節目,放工去博物館行下拍下拖,都不失為特別/有心思既行程.
雖然今次我係自己一個入黎參觀,入場都已經係六點幾鐘,但感受到周圍既氣氛係好輕鬆好熱烈,每個到訪者都懷著愉快既心情遊逛.
M+地下大堂本身已經好熱鬧,空間亦寬敞,風格係木色系作主調,燈光柔和.
因為一般需要透過klook預先預約入場,所以黎到展館直接去排隊嘟code入場就得.
地下只有一個展館係講述舊時的香港,以藝術品,建築,設計及電影幾個元素,去呈現香港既視覺文化,表達呢個城市既轉變.
一黎到我已經幾中意呢個館,因為我個人十分喜歡睇地圖,平面圖之類,呢度有好多建築物既圖則,地區的舊地圖或規劃圖之類.
如果真係駐足細閱,應該都有排睇,所以唔少地圖我都影相返去再慢慢睇,但呢啲展品真係幾得意.
除左畫作,藝術品,仲有裝置藝術,甚至行為藝術既片段,有啲係兒童不宜,但就十分juicy.
仲有唔少反映緊中國以及共產黨既作品,以及少量環球國際響早年具歷史價值既展覽品.
我其實入黎展館無耐就已經幾中意呢度,除左因為呢度個氛圍,以及空間大,展藏品種類豐富之外,而係呢度幾大眾化.
呢間博物館唔會懶高檔當正參觀者唔識,高高在上灌輸教育,唔似政府博物館果啲好悶好乏味,一大片文章介紹一件藝術品.
呢度係以淺白易明既一小段文字,扼要描述藝術品的設計概念,解釋製作人背後的心思,展品表達的思想.
輕輕以十零秒睇完個描述,你就認識及理解左一件作品,完全唔覺得辛苦.
我雖然本身無興趣行藝術館,但今次都花左唔少時間去欣賞一部分既作品.
哪怕大多展品都係飛住睇,只要你真係停低了解過其中一項,都已經袋到野落袋,不枉此行.
上層展館真係好大,分左幾個展覽廳,各自再劃分一格格空間,入到去有機會miss左一啲位置唔記得睇,亦可能唔識路走返出去大堂.
本身諗住自己一個黎M+行個零鐘就走,本住到此一遊心態,點知發現又幾精彩,不禁仔細地遊覽起黎,結果行左足足兩個鐘,腳都累.
好在展館有唔少位置提供座椅,我坐響大堂中央果條旋轉樓梯打卡位附近休息左幾個字,就逛埋M+剩餘既地方.
M+收費區以外既公家地方都幾多野睇,佢自設戲院,cafe,精品店,紀念品店,仲有啲多用途空間.
M+下層有一大片空間,可以坐下行下放下空,或者影下相打卡.呢度無野睇,主要係感受個空間感.
最底層以外展館其中一個展覽廳會於翌日開始開放作草間彌生收費展覽,今晚有HKT包場優先睇,街外人最多只能企響外圍睇到門口第一幅草間彌生作品自畫像.
而底層有大型草間彌生既裝置藝術,地下就有signature既波點南瓜,都係預左俾市民影相.
紀念品店好大,幾多野睇,主要售賣與樓上展覽相關既商品,我自己雖然太窮無錢入場睇草間彌生展覽,但就買左兩張postcards留念.
呢度值得一提係佢中間果個大型書畫區域,本本超巨型書籍,關於不同主題例如動畫,汽車,藝術家,圖文並茂,好值得一睇,翻開內頁欣賞.
行埋紀念品店,原來已經九點半,足足響M+玩左三個鐘,趕緊穿過藝術公園出去坐小巴出番市區食飯,勁肚餓.
意想唔到M+咁多野睇咁有趣,自己一個行反而可以按個人喜好,將時間分配響自己有興趣既作品,深入了解.
自己一個純參觀都花咁多時間,如果同埋伴侶或朋友黎,到處影相打卡,可能真係玩足一日.
好耐無試過呢種幾fruitful幾滿足既感覺,行完M+真心幾開心,仲要唔使錢.雖然黎緊要入場費,但都誠意推介大家前往.
