12-13/11/22 煙霞
諗都諗唔到有機會入住位於紅磡海皮/黃埔邊皮位既九龍海灣酒店.
呢度與其話酒店,不如話大部分用途係海灣軒service apartment.
呢個under長實既住宅項目,係集團旗下幾間家庭式酒店之一.
M字型建築拆分幾座,月租與日租酒店混合形式經營.
值得一提呢度基本房型已經係兩房兩廳連開放式廚房,有六百幾呎,兩個人入住真心未必用得晒咁多地方.
同埋呢度既裝修風格似屋企,如果時間耐啲殘舊啲就會似度假村,style就一定唔係平時酒店staycation果種.
對於一啲要搵service apartment短租既人,日租一次就可以體驗一下呢度好唔好住,都不失為好方法.
呢度房間既配套基本上做足,只係缺乏可見的叉電位,同埋飯廳欠缺燈光.
梳化我懷疑佢用黎加床用,所以既硬又唔好坐,亦唔美觀.
可能實在太少人前黎日租度假,所以間房比預期整潔及新淨.
入房時所有冷氣已開著,間屋勁涼,幾舒服,feel唔到果種長期丟空既感覺.
廚房個雙門雪櫃超新淨,十足十從未用過咁,其餘配置就見到歲月既痕跡.
因為揀選海景房間,所以客廳及主人房窗外就係維多利亞海景,望向北角.
望埋下面海灣軒既花園,確實有種心曠神怡,寫意之感.
不過每間房都採用大幅玻璃窗,無平時酒店果種鏡面反射功能,日夜都顯示到屋內狀況,搞鬼係呢度既住客又唔興落窗簾架喎,奇怪.
本身酒店位置就偏僻,唔近紅磡站又唔近黃埔,出面無配套可言,酒店外圍只有少量商店,但無時間去睇.
唯一好處就係近海,一行出去就係海濱長廊,行到去黃埔或尖東,無臭味幾舒服.
酒店內部只得一間規模甚小既餐廳,只於有限時間服務,夜少少想搵野食都有困難.
會所設施比想像中多,似係典型長實樓盤會所既設計及規模,有卡啦OK房,桌球,足球機,閱讀室等等.
交通方面,最近要步行去紅磡碼頭嘉利酒店巴士總站,否則就要坐的士.
酒店提供免費shuttle但半小時一班,經都會海逸酒店前往九龍酒店.如果去尖沙咀係方便既,但紅磡站就要落車行多兩步.
海灣軒service apartment住客就有15分鐘一班既shuttle,前往紅磡站及尖沙咀漢口道,可惜酒店房客無得坐.
我地今次book既係慶祝紀念日package,所以酒店包兩點鐘late check out,送埋氣球裝飾,一枝紅酒及一磅雜果蛋糕,個蛋糕好地道香港feel,haha.
整體入住體驗係唔錯,主要係空間寬敞,大把位置打開行李,窗外風景靚,幾清靜幾好住.
唔好處係酒店本身係service apartment方式經營,唔係酒店,所以只提供基本既酒店服務,枕頭款式只得一種,床都偏硬.
另外呢度長住既人都幾多,有不少內地人,我地覺得係附近Poly既NDS,不論咩人,響走廊出入時聲響都會傳入屋內,可見隔音一般.
無論如何,我覺得前來呢度住一晚已經係好神奇既事,相信呢度冷門到可能有啲人聽都未聽過,lol.
