無盡旅途 Endless Journey

15/12/22 陰

11/12/22
星期日好歌 #299 A Moment Like This - Leona Lewis

3/12/22 涼
難得遇上凍凍地終於有番冬天感覺既日子,夜晚決定去打邊爐.
睇得微辣短片多,今次終於響銅鑼灣食同撈同煲,不過以我所知呢間野同微辣無關的,只係搵佢宣傳.
揀選既湯底有半邊雞,雞肉嫩滑,有油香,浸到個湯有雞油但不油膩,成個湯仲係keep到幾清.
另外面頭鋪上大量蟲草花及桃膠,賣相吸引.
Order左個海鮮拼盤，有鮑魚,蟶子,帶子,質素正常,鮑魚算大隻.
手切肥牛好食,好香濃牛肉味,而且都爽口,唔會切得太薄.
黑毛豬肉相對正常,本身砌成一朵花,索性成舊掉落湯鍋浸熟算.
蝦滑墨魚滑份量唔算多,但都真材實料,見到一絲絲蝦肉,爽口彈牙,味道唔錯.
好少地方見到豬腰,但唔太習慣用黎做火鍋配料,食落覺得無乜味道,純粹夠滑,怪怪地.
呢度臨尾會送兩款甜品,包括懷舊青檸啫喱,以及呢度獨有既金魚糖不甩.
店員先將金魚形狀既糖不甩糯米粉團掉落湯窩,滾熟後再剪件,再沾上花生糖碎.
其實食落就等於一般新鮮熱辣辣出爐既糖不甩,只不過呢度係透過火鍋黎滾熟糖不甩咁解.
另外呢度特別之處除左係佢懷舊既裝修設計外,仲成晚播住經典懷舊金曲,一首首舊歌.
同埋咁岩隔離檯有人生日,店員真係會改播生日歌曲慶祝,等全場食客一同慶祝,搞笑得黎又不失尷尬.
講起店員,呢度既店員服務態度好好,熱心協助食客,又會解釋菜式,應該係train過要咁樣做.
呢間野會唔會翻叮就未必,不過當一次體驗,食個環境都OK,價錢唔係十分貴,都算合理.

26/11/22 晴
相隔幾年,又係時候睇Sue偶像鄭伊健演唱會,HERE & NOW EKIN IN CONCERT 2022.
今次連bombom棒都無送,於是要買枝熒光棒俾Sue玩,haha.
另外,今次變成三面台,我地都覺得可能因為鄭伊健老了,四面台走動多,可能佢未必搞得掂.
三面台要打斜睇係少少辛苦,不過視覺效果幾好,可以見到台上歌手同台下觀眾之間既互動,影全場都幾震撼.
少左機關,多左舞台視像動畫元素,成個stage都係一大片LED屏幕,播映唔同既環境,畫面好靚.
不過rundown上就唔太get到製作團隊想表達既message,因為歌曲編排時快時慢,次序都有啲奇怪.
但我地睇尾二場,伊健算唱得好好,交足功課.雖然佢份人hea,跳舞啲姿勢都係cap cap地,但呢個係佢既character黎,吹佢唔脹haha.
當年既偶像派歌手,上台當然係形象行先,最緊要型,有台風.所以伊健一開頭都不斷chok樣,好好笑.
無特別邀請嘉賓之下,演唱會算比較快完,唱到10點半之後就encore環節,去到11點就散場,就算有部分觀眾留守都無再上台了.
想聽既慢歌都聽左,快歌部分有啲歌曲我唔認識,所以睇得無咁投入.
但估唔到會唱數碼暴龍,呢一幕全場就好hyper好開心.
希望伊健幾年後再出黎開show,可以繼續keep住團火同power啦~

27/11/22
星期日好歌 #298 Kong/好人 小肥/Joey Tang 鄧建明

12-13/11/22 煙霞
諗都諗唔到有機會入住位於紅磡海皮/黃埔邊皮位既九龍海灣酒店.
呢度與其話酒店,不如話大部分用途係海灣軒service apartment.
呢個under長實既住宅項目,係集團旗下幾間家庭式酒店之一.
M字型建築拆分幾座,月租與日租酒店混合形式經營.
值得一提呢度基本房型已經係兩房兩廳連開放式廚房,有六百幾呎,兩個人入住真心未必用得晒咁多地方.
同埋呢度既裝修風格似屋企,如果時間耐啲殘舊啲就會似度假村,style就一定唔係平時酒店staycation果種.
對於一啲要搵service apartment短租既人,日租一次就可以體驗一下呢度好唔好住,都不失為好方法.

20/11/22
星期日好歌 #297 破曉 林憶蓮

11/11/22 晴
咁岩星期五請左半日假,找住最後的尾巴,把握西九龍文化區M+博物館最後一日免費入場.
M+開幕左成年,未開幕前已經覺得座建築幾靚,係西九公園既一個打卡位.
上年佢地開放參觀,香港疫情下無新地方好去,結果人群一浪接一浪地撲去M+.
本身我同Sue對藝術呢方面又識條鐵,所以一直無plan會去.
但最近得悉原來將來入場要成$120,睇草間彌生更要total $240,都係趁免費入場抵玩啲.

5/11/22 涼
講左十世,平時間中都經過,終於去食尖沙嘴K11 MUSEA Artisan Lounge既下午茶.
以前呢間好多人排隊,要預早book位,依家好似感覺少左人幫襯,都唔算完全坐滿,餐廳亦無提早一日同我confirm booking.
可以坐到樹下既卡位好開心,係典型啲港女打卡位黎,不過我地就比較土炮,無高級攝影器材,亦無特別執相.
原來11月餐廳係聯乘新加坡烘焙咖啡店Bakeaholic,提供東南亞風味下午茶.
食唔到Artisan Lounge原先自家出品,但有個特別既餐牌食期間限定,唔知是否好事.
餐廳另外同珠寶品牌Chaumet合作,有高級版既afternoon tea set,價錢再貴多一半.
店員將下午茶套餐掛上鐵勾,成set點心就係咁懸掛住半空,好精緻.
鹹點包括金箔魚子醬包點,舞茸野菜小酥盒,碧螺春擂茶凍,松葉蟹奶油薯餅,烤南瓜羊奶酪雞肉餡餅,牛蒡脆脆等.
甜點則有香茅水信玄餅,烤椰絲斑蘭瑪德蓮蛋糕,叻沙鬆餅,椰汁奶凍和鹹牛油伯爵曲奇等.
味道方面大致都無伏,本身我地對high tea無大興趣,所以味道上要求不高,唔好太甜太膩就得.
難得呢度既甜點鹹點都整得偏細件,係bite size一口吞落肚,所以係可以清得晒唔會飽到頂住個肚.
鬆餅比較一般,因為太硬唔夠鬆化,相信唔關我地擺耐左攤凍,而係佢本身質地係咁.
雖然佢俾左三款醬,但都太細盒,所以唔算食得滋味.但隻香口辣醬又幾過癮.
獨立上檯既椰子奶凍又幾好味,香濃椰子味,夠滑易入口.
整體呢度食high tea都係為左打卡,食物質素都係其次.確實環境氣氛都好好,幾enjoy既.

31/10/22 三號風球
同SueSue拍拖3000日紀念,放工即興去食觀塘放題.
已經數唔出幾耐無食放題,睇blog紀錄可能已經接近五年前,lol.
極尚大瀛喜日本料理,餐廳幾大,二人座位都係偏細,四至六人卡位會坐得舒服.
自助區都大,前菜小食,飲品都超級豐富,連Somersby都有,甜品款式就正常.
食物方面,用手機落單,menu食物種類同坊間放題鋪大同少異,而款式就勉強足夠.
感覺唔算十分多選擇,但基本食晒一round想食既野就已經開始飽.
以前去放題店用紙筆落單,感覺刺激興奮好多,以家用手機落單就有預覽圖可以睇左先決定食唔食.
魚生方面,都算切得厚,溫度偏凍,雪得略嫌硬身,少左啲鮮味,但味道絕對無問題,可以喪食.
炸物方面,呢間炸得幾好,炸粉薄,炸皮香脆,調味都合適,幾好食.
熟食就一般無特別,叫一客兩個人share就夠.
太多年無食放題,加上老左,俾足兩個幾鐘俾我坐到十點都無用.
依家食一兩round食左約一個鐘都已經飽左,再坐下慢慢食,都同其他食客一齊提早走.
以前放題係慶祝大時大節既節目,依家社會發展再富裕左,多左更多高價位餐廳.
放題呢幾年無乜點加價,變得好似普通一餐咁,因為出去食靚少少既日本野,埋單一定比放題更貴.